ஜோகூர் பாரு, நவம்பர்-15 – ஜோகூர், மாச்சாப் அருகே PLUS நெடுஞ்சாலையின் 69.5-வது கிலோ மீட்டரில் டிரேய்லர் லாரி உட்பட 3 வாகனங்களை உட்படுத்திய விபத்தில் ஒருவர் கொல்லப்பட்ட வேளை, இருவர் காயமடைந்தனர்.
இன்று காலை 7.43 மணியளவில் நிகழ்ந்த அவ்விபத்தில் மரணமடைந்தவர் 33 வயது மோட்டார் சைக்கிளோட்டி என ஜோகூர் தீயணைப்பு -மீட்புத் துறை கூறியது.
காயமடைந்தவர்கள், Honda Civic காரின் ஓட்டுநரும் அதன் பயணியும் ஆவார்.
அதில் பயணியை அங்கிருந்த பொது மக்கள் மருத்துவமனைக்கு அனுப்பி வைத்த நிலையில், காரின் இடிபாடுகளில் சிக்கிக் கொண்ட ஓட்டுநரை தீயணைப்புக் குழுவினர் சிறப்புக் கருவிகளின் உதவியுடன் வெளியே மீட்டனர்.
எனினும், Volvo ரக டிரேய்லர் லாரியின் ஓட்டுநர் காயமின்றி உயிர் தப்பினார்.
விபத்துக்கான காரணம் இன்னமும் விசாரணையில் உள்ளது.
