செப்பூத்தே, நவம்பர் 24-கோலாலாம்பூர், செப்பூத்தே, தாமான் யுனைடெட், ஜாலான் செப்பாடு அன்னாம் பகுதியில் உள்ள, 2 அடுக்குமாடி தொகுதிகளை உட்படுத்திய 104 வீடுகளை உடனடியாக காலி செய்ய உத்தரவு பிறப்பிக்கப்பட்டுள்ளது.
அருகிலுள்ள மலைச்சரிவான பகுதியில் இன்று காலை நிலச்சரிவு ஏற்பட்டதை அடுத்து, இந்த முன்னெச்சரிக்கை நடவடிக்கை எடுக்கப்பட்டுள்ளது.
முன்னதாக, காலை 11 மணி வாக்கில் தகவல் கிடைத்து, 11 வீரர்கள் அடங்கிய தீயணைப்பு மீட்புக் குழுவினர் சம்பவ இடம் விரைந்தனர்.
சுமார் 60 மீட்டர் நீளத்திற்கு ஏற்பட்ட அந்நிலச் சரிவு, இரு வாகனங்களுக்கும் சில மோட்டார் சைக்கிள்களுக்கும் சேதத்தை ஏற்படுத்தியது.
அவற்றில் ஒரு கார் முழுவதுமாக மண்ணில் புதையுண்டது.
எனினும், உயிர் சேதம் எதுவும் இதுவரை அறிவிக்கப்படவில்லை.
