ஹோங் கோங்கில் குடியிருப்புக் கட்டடங்களில் ஏற்பட்ட பெருந்தீ; 44 பேர் பலி, 279 பேரைக் காணவில்லை
ஹோங் கோங், நவம்பர்-27,
ஹோங் கோங்கில் வானுயர அடுக்குமாடி குடியிருப்புக் கட்டடங்கள் வரலாறு காணாத அளவுக்குத் தீப்பற்றி எரிந்ததில் குறைந்தது 44 பேர் உடல் கருகி மாண்டனர்.
மேலும் 279 பேரை இன்னமும் காணவில்லை.
Tai Po மாவட்டத்தில் Wang Fuk Court எனும் குடியிருப்பே இந்த கடும் தீயில் சிக்கியுள்ளது.
800-க்கும் அதிகமான தீயணைப்பு-மீட்புப் படையினர் தீயை அணைக்க போராடி வருகின்றனர்.
அதில் 37 வயது தீயணைப்பு வீரர் ஒருவரும் துரதிஷ்டவசமாக தீயில் சிக்கி பலியானார்.
இதுவரை 8 கட்டடங்களில் 4 கட்டடங்களில் தீ கட்டுப்பாட்டுக்குள் கொண்டு வரப்பட்டுள்ளது.
தீ கொளுந்து விட்டு எரிவதால் குறிப்பாக மேல் மாடிகளை நெருங்க முடியாத அளவுக்கு அனல் அடிப்பதாகவும் இதனால் தீயை அணைக்கும் பணி பெரும் சவாலைச் சந்தித்திருப்பதாகவும் கூறப்படுகிறது.
ஹோங் கோங் வரலாற்றிலேயே மிக உயரிய 5-ஆம் எச்சரிக்கை அளவில் இத்தீ வைக்கப்பட்டுள்ளது.
விடிய விடிய நடந்த மீட்புப் பணிகளில் ஒரு குழந்தையும் ஒரு மூதாட்டியும் காப்பாற்றப்பட்டனர்.
அக்குடியிருப்புகளில் வசிப்பவர்களுடன் தொடர்பை இழந்த உறவினர்கள் சாலைகளில் அதிகாரிகளிடம் உதவி கேட்டு கூச்சலிட்டு வருகின்றனர்; மனைவி உள்ளே சிக்கிக் கொண்டதாக 70 வயது முதியவர் ஒருவர் கீழே கதறிய புகைப்படங்களும் வைரலாகி பார்ப்போரை மனம் பதறச் செய்தது.
மூங்கில் மற்றும் styrofoam எனப்படும் மெத்து நுரை உள்ளிட்ட எரியக்கூடிய பொருட்களால் ஏற்பட்ட மனிதக் கொலையே தீ விரைவாகப் பரவக் காரணமாக இருக்கலாம் என்ற சந்தேகத்தின் பேரில் 3 கட்டுமான நிறுவன நிர்வாகிகள் கைதுச் செய்யப்பட்டுள்ளனர்.
எனினும் தீ ஏற்பட்டதற்கான உண்மைக் காரணம் இன்னும் தெரியவரவில்லை.
