பேங்கோக், நவம்பர் 22-பெரும் சர்ச்சைக்கு மத்தியில் தாய்லாந்தில் நடைபெற்ற 2025 Miss Universe பிரபஞ்ச அழகிப் போட்டியில் மெக்சிகோவின் ஃபாத்திமா போஷ் மகுடம் சூடினார்.
சில வாரங்களுக்கு முன், போட்டி ஏற்பாட்டாளர்கள் ஃபாத்திமாவை ‘முட்டாள்’ என்று நேரலையில் அவமதித்ததால், அவர் மேடையை விட்டு வெளியேறினார்.
இது உலகளவில் பெரும் சர்ச்சையானது.
அந்த அவமானத்தைக் கடந்து, இறுதிச் சுற்றில் மேடையில் நின்று, ‘உங்கள் உண்மைத்தன்மையை நம்புங்கள், உங்கள் கனவுகள் முக்கியம்’ என்ற வலிமையான செய்தியை அவர் வழங்கினார்.
தன்னம்பிக்கை, அறிவு, சமூகப் பொறுப்பு குறித்த அவரது பதில்கள் நடுவர்களிடமிருந்து அதிக மதிப்பெண்களைப் பெற்றன.
இதையடுத்து தாய்லாந்து, வெனிசுவலா, பிலிப்பின்ஸ், ஐவரி கோஸ்ட் போட்டியாளர்களைத் தோற்கடித்து அவர் கிரீடம் வென்றார்.
இது மெக்சிகோவுக்கு கிடைத்துள்ள நான்காவது Miss Universe அழகிப் பட்டமாகும்.
சோதனைகளைச் சாதனையாக்கிய ஃபாத்திமாவுக்கு வாழ்த்துகள் குவிந்து வருகின்றன.
எனினும், ஃபாத்திமா போஷ் குறித்து அதிர்ச்சி குற்றச்சாட்டுகளும் எழுந்துள்ளன.
போட்டி நீதிபதிகளில் ஒருவராக இருந்து ஒரு நாளுக்கு முன்னர் அதிலிருந்து விலகியவரான Omar Harfouch, “இந்த வெற்றி போலியானது” எனக் கூறி பரபரப்பை ஏற்படுத்தியுள்ளார்.
Miss Universe போட்டியின் உரிமையாளரான Raúl Rocha என்பவர், ஃபாத்திமாவின் தந்தையின் நெருங்கியத் தொழில் பங்காளி என்றும், “வெற்றியை உறுதிச் செய்” எனக் கூறி ஃபாத்திமாவுக்கே தன்னை வாக்களிக்க அவர் வற்புறுத்தியதாகவும் Omar குற்றம் சாட்டியுள்ளார்.
இந்த தகவலை அவர் போட்டிக்கு ஒரு நாள் முன்பே HBO-வில் வெளியிட்டதாகவும், முழு விவரங்கள் அடுத்தாண்டு மே மாதத்தில் வெளியாகும் என்றும் கூறியுள்ளார்.
ஒரு பக்கம் அவமானத்திலிருந்து உச்சத்தைத் தொட்ட ஃபாத்திமாவின் சாதனையும், மறுபக்கம் Omar-ரின் குற்றச்சாட்டுகளும் வைரலாகி வருகின்றன.
எது எப்படியோ Miss Univers வரலாற்றிலேயே யாராலும் மறக்க முடியாத அழகிப் போட்டியாக இந்த தாய்லாந்து போட்டி திகழும் என்பது நிச்சயம்…
