ஜொஹேனஸ்பெர்க், நவம்பர்-24 – தென்னாப்பிரிக்காவில் நடைபெற்ற G20 உச்ச நிலை மாநாட்டில் இந்திய பிரதமர் நரேந்திர மோடியும் பிரதமர் டத்தோ ஸ்ரீ அன்வார் இப்ராஹிமும் குறுகிய ஆனால் முக்கியமான கருத்துப் பரிமாற்றத்தில் ஈடுபட்டனர்.
இரு தலைவர்களும் பொருளாதாரம், வர்த்தகம், கல்வி மற்றும் புதிய தொழில்நுட்பங்களில் ஒத்துழைப்பை விரிவுபடுத்தும் கடப்பாட்டை மறுஉறுதிப்படுத்தினர்.
மோடி, இருநாட்டு உறவுகளை பல துறைகளில் விரிவாக்கும் நோக்கத்தை வலியுறுத்தினார்;
அன்வாரோ, பரஸ்பர நம்பிக்கையும் மரியாதையும் இவ்வட்டார வளர்ச்சிக்கு வழிவகுக்கும் எனக் கூறினார்.
குறிப்பாக இரு நாட்டு மக்களுக்கும் நன்மைகளைக் கொண்டு வரும் வியூக ஒத்துழைப்பில் கை கோர்ப்போம் என, மோடியின் ஃபேஸ்புக் பதிவைப் பகிர்ந்த போது அன்வார் சொன்னார்.
மோடியுடனான சந்திப்பு அர்த்தம் வாய்ந்ததாக அமைந்ததாகவும், இந்திய-மலேசிய உறவுகள் தொடர்ந்து வலுப்பெறும் என்றும் பிரதமர் நம்பிக்கைத் தெரிவித்தார்.
