கோலாலம்பூர், நவம்பர்-25 – 16 வயதுக்குக் குறைவான குழந்தைகள் சமூக வலைத்தள கணக்குகள் திறந்தாலும், பெற்றோர்கள் தண்டிக்கப்பட மாட்டார்கள் என தொடர்புத் துறை துணையமைச்சர் தியோ நீ சிங் உறுதியளித்துள்ளார்.
16 வயதுக்கு உட்பட்டவர்கள் புதிய சமூக ஊடக கணக்குகள் திறக்க அடுத்தாண்டு தடை விதிக்கப்பட்ட பிறகும் இது தொடரும் என்றார் அவர்.
வயதுகுறைந்த சிறார்கள் தான் சமூக ஊடகக் கணக்கைத் திறந்தார்கள் என்பதை சட்ட ரீதியாக நிரூபிப்பது கடினம் என்பதாலேயே பெற்றோருக்கு தண்டனை இல்லை என தியோ விளக்கினார்.
என்றபோதிலும், குழந்தைகளின் இணையப் பயன்பாட்டை கண்காணிப்பதும் இணையப் பாதுகாப்பு மீதான கல்வியறிவை அளிப்பதும் பெற்றோரின் முக்கியப் பொறுப்பு என அவர் வலியுறுத்தினார்.
பாலியல் சீண்டல் உட்பட, குழந்தைகளை இணைய அச்சுறுத்தல்களிலிருந்து பாதுகாக்கும் முயற்சியின் ஒரு பகுதியாக அடுத்தாண்டு இந்த கட்டுப்பாட்டை அமுல்படுத்த அரசாங்கம் இலக்கு வைத்திருப்பதாக, அமைச்சர் டத்தோ ஃபாஹ்மி ஃபாட்சில் முன்னதாகக் கூறியிருந்தார்.
இந்தத் தடை அமுலுக்கு வரும் போது, சமூக ஊடக தளங்கள் eKYC வயது சரிபார்ப்பு முறையைப் பயன்படுத்த வேண்டும்.
அதாவது, MyKad, கடப்பிதழ் அல்லது MyDigital ID மூலம் ஒருவரின் வயது உறுதிச் செய்யப்படும்.
இது வரவிருக்கும் இணையப் பாதுகாப்புச் சட்டத்துடன் இணைந்த நடவடிக்கையாக இருக்குமென ஃபாஹ்மி கூறியுள்ளார்.
சமூக ஊடக பயன்பாட்டுக்கான வயது வரம்பு விவகாரத்தில் அரசாங்கத்தின் இவ்வறிவிப்பை நிபுணர்கள் வரவேற்று, இது பள்ளிகளும் பெற்றோர்களும் சிறார்களின் டிஜிட்டல் விழிப்புணர்வை மேம்படுத்த உதவும் என கூறுகின்றனர்.
