ஷா ஆலாம், நவம்பர்-28 – மாணவர்களிடையே பகடிவதை மற்றும் குற்றச்செயல்களைத் துடைத்தொழிக்கும் முயற்சியாக பள்ளிகளில் பிரம்படி தண்டனை மீண்டும் கொண்டு வரப்பட வேண்டும்.
சிலாங்கூர் போலீஸ் தலைவர் டத்தோ Shazeli Kahar அவ்வாறு வலியுறுத்தியுள்ளார்.
பள்ளிகளில் பகடிவதையும் குற்றச்செயல்களும் அதிகரித்து, மாணவர்களின் எதிர்காலத்தை பாதிக்கக்கூடிய பெரும் சமூக சீர்கேடாக மாறி வருகிறது.
இது கவலையளிப்பதாகக் கூறிய அவர், பிரம்படி தண்டனையை மீண்டும் கொண்டு வருவதே சரியாக இருக்குமென்றார்.
“மனிதர்களுக்கு பட்டால் தான் புரியும்; வெறும் வாய் வார்த்தையாக பேசிக் கொண்டிருந்தால் வேலைக்கு ஆகாது” என்றார் அவர்.
பிரம்படி தண்டனையை மீண்டும் கொண்டு வருவதில் உள்ள தடங்கல்களை ஆராய்ந்து அதற்கேற்ற தீர்வுகளை அமுல்படுத்தலாம்.
உதாரணத்திற்கு, ஆசிரியர்கள் அதனை துஷ்பிரயோகம் செய்யாமலிருப்பதை உறுதிச் செய்ய, கட்டங்கட்டமாகவும் தெளிவான வழிகாட்டுதல்களுக்கு ஏற்ப கட்டுப்பாடாகவும் அதனை அமுல்படுத்தலாம்.
பிரம்படி என்றதுமே அது கொடூரமானது என்ற எண்ணம் பலருக்கு வந்துவிடுகிறது; உண்மையில் அதில் பல பிரிவுகள் உள்ளன, அதோடு சூழ்நிலைக்கும் செய்த தவறுக்கும் ஏற்பவே அத்தண்டனை வழங்கப்படும்.
எனவே, எந்தளவுக்கு ஓங்கி அடிப்பது, எத்தனை முறை அடிப்பது போன்ற பல விஷயங்களை நன்காராய்ந்து பாதுகாப்பாக அதனை மீண்டும் அறிமுகப்படுத்தலாம் என Shazeli தெரிவித்தார்.
சிலாங்கூரில் கடந்தாண்டு ஜனவரி முதல் அக்டோபர் வரை 108 பள்ளி மாணவர்கள் பல்வேறு குற்றங்களுக்காக கைதுச் செய்யப்பட்டனர்.
இவ்வாண்டு அதே காலக்கட்டத்தில் அவ்வெண்ணிக்கை 122-டாக உயர்ந்திருப்பதை அவர் சுட்டிக் காட்டினார்.
