தொழிலாளர் சுரண்டலுக்காக 43 இந்தோனேசிய பெண்களை கடத்தினர்; துப்புரவு நிறுவன 8 முகவர்கள் 174 குற்றச்சாட்டுகள்

கிள்ளான், நவ 28 – கடந்த மாதம் 43 இந்தோனேசிய பெண்களை தங்களது சுய லாபத்திற்கான சுரண்டலுக்கு கடத்தியதாக 174 குற்றச்சாட்டுகளின் பேரில், இரண்டு சகோதரர்கள் உட்பட எட்டு துப்புரவு நிறுவன முகவர்கள் இன்று கிள்ளான் செஷன்ஸ் நீதின்றத்தில் குற்றஞ்சாட்டப்பட்டனர்.

நீதிபதி முகமட் சப்ரி இஸ்மாயில் ( Mohd Sabri Ismai ) முன்னிலையில் அனைத்து குற்றச்சாட்டுகளும் வாசிக்கப்பட்டபோது, 45 வயதான ஆடவர் , 48 வயதுடைய அவரது சகோதரி உட்பட இதர அறுவர் தங்களுக்கு எதிரான குற்றச்சாட்டை மறுத்து விசாரணை கோரினர்.

இவர்களுடன் 38 வயதான Ismaidah மற்றும் 36 வயதான Siti Nurjanah Menah ஆகிய இரு இந்தோனேசிய பெண்களும் குற்றஞ்சாட்டப்பட்டனர்.

அவர்கள் மீதான குற்றச்சாட்டுக்கள் நிரூபிக்கப்பட்டால் அதிகபட்சமாக 20 ஆண்டுகள் சிறைத்தண்டனை மற்றும் அபராதமும் விதிக்கப்படலாம்.

கடந்த அக்டோபர் 10 மற்றும் 11 ஆம் தேதிகளில் கிள்ளான், Bandar Bukit Tinggi 2, Bandar Bestari மற்றும் Bandar Botanic ஆகிய இடங்களில் அவர்கள் இக்குற்றங்களை புரிந்ததாக கூறப்பட்டது.

அவர்கள் அனைவருக்கும் நீதிமன்றம் 470,000 ரிங்கிட் மொத்த ஜாமினை நிர்ணயித்ததோடு இரண்டு வெளிநாட்டினருக்கும் கூடுதல் நிபந்தனைகளையும் விதித்தது.

இவர்கள் மீதான வழக்கு அடுத்த ஆண்டு ஜனவரி 16ஆம் தேதி விசாரணைக்கு வரும்.

கடந்த மாதம்,கிள்ளானிலுள்ள ஐந்து வீடுகளில் நடத்தப்பட்ட சோதனையில் 49 இந்தோனேசிய பெண்கள் போலீசாரால் மீட்கப்பட்டதாக தெரிவிக்கப்பட்டது.