சென்னை, நவம்பர்-29 – வங்கக்கடலில் இலங்கை அருகே உருவான ‘டிட்வா’ (Ditwah) புயல், சென்னை மற்றும் தமிழகத்தின் வட மாவட்டங்களை நோக்கி நகருகிறது.
இதனால், செங்கல்பட்டு உட்பட 4 கடலோர மாவட்டங்களில் இன்று அதிக கனமழைக்கான சிவப்பு எச்சரிக்கை விடுக்கப்பட்டுள்ளது.
டிட்வா புயலின் தாக்கத்தால், பல கடலோர மாவட்டங்களில் பள்ளி, கல்லூரிகளுக்கு விடுமுறை அறிவிக்கப்பட்டுள்ளது.
கடலூர், நாகப்பட்டினம், மயிலாடுதுறை, திருவாரூர், கள்ளக்குறிச்சி, புதுக்கோட்டை உள்ளிட்ட மாவட்டங்களில் அனைத்து பள்ளி மற்றும் கல்லூரிகளுக்கும் விடுமுறை அறிவிக்கப்பட்டுள்ளது.
கடும் மழை, பலத்த காற்று மற்றும் சில இடங்களில் நீர்மட்டம் உயர்ந்திருப்பதால் மாணவர்களின் பாதுகாப்புக் கருதி இந்த முடிவு எடுக்கப்பட்டது.
தஞ்சாவூர் மற்றும் விழுப்புரம் மாவட்டங்களில் பள்ளிகளுக்கு மட்டும் விடுமுறை அறிவிக்கப்பட்டுள்ளது.
சில பகுதிகளில், மழை அதிகரிக்கும் சாத்தியம் உள்ளதால் அரை நாள் விடுமுறை அறிவிக்கப்பட்டதாக தகவல்கள் தெரிவிக்கின்றன.
டிட்வா புயல் அடுத்த 24 மணிநேரத்தில் மேலும் வலுத்து, மாநிலத்தின் தென் மற்றும் வடக்குக் கடலோரப் பகுதிகளில் கனமழை பெய்வதோடு பலத்த காற்று வீசும் வாய்ப்பும் உள்ளதாக வானிலை மையம் எச்சரித்துள்ளது.
மக்கள் தேவையற்ற பயணங்களைத் தவிர்த்து, பாதுகாப்பு வழிகாட்டுதல்களை பின்பற்றுமாறு அதிகாரிகள் கேட்டுக்கொண்டுள்ளனர்.
இந்த டிட்வா புயல் முன்னதாக இலங்கையைத் தாக்கியதில், கனமழை, பெருவெள்ளம், நிலச்சரிவு சம்பவங்கள் ஏற்பட்டு குறைந்தது 56 பேர் பலியாயினர்.
