போர்டிக்சனில் தூங்கிய நாய்க்குட்டியை 2 முறை கார் ஏற்றி கொன்ற ஓட்டுநர்: தீவிர விசாரணைக்கு வழக்கறிஞர்கள் அமைப்பு வலியுறுத்தல்

போர்டிக்சன், ஆகஸ்ட்-9 – நெகிரி செம்பிலான், போர்டிக்சனில் தூங்கிக்கொண்டிருந்த நாய்க்குட்டியை 2 முறை காரை ஏற்றி கொன்ற ஓட்டுநர் மீது தீவிர விசாரணை நடத்த வேண்டும் என ‘விலங்குகள் உரிமைகளுக்கான வழக்கறிஞர்கள் அமைப்பு’ (Lawyers for Animal Rights) கோரிக்கை விடுத்துள்ளது.

​லுக்குட் போலீஸ் நிலையத்தில் அளிக்கப்பட்ட புகாரின்படி, Mitsubishi Triton இரக பிக்கப் டிரக் ஓட்டுநர் ஒருவர், சாலையில் தூங்கிக்கொண்டிருந்த நாய்க்குட்டியின் மீது காரை ஏற்றியுள்ளார்.

பின்னர், காரைப் பின்னோக்கி எடுத்து மீண்டும் அதே நாய்க்குட்டியின் மீது ஏற்றி, அதைக் கொடூரமாகக் கொன்றுள்ளார்.

​”இது கவனக்குறைவால் நடந்த விபத்து அல்ல, திட்டமிட்டு நடத்தப்பட்ட கொடூரம்” என சுட்டிக் காட்டிய வழக்கறிஞர் ராஜேஷ் நாகராஜன், இதை வெறும் குற்றவியல் சட்டத்தின் கீழ் சாதாரண வழக்காகப் பதிவுச் செய்யாமல், 2015-ஆம் ஆண்டு விலங்குகள் நலச் சட்டத்தின் கீழ் விரைந்து விசாரணை நடத்த வேண்டும் என வலியுறுத்தியுள்ளார்.

CCTVகாட்சிகள் மற்றும் தடயங்களை விரைவாகச் சேகரித்து, சம்பந்தப்பட்ட ஓட்டுநரைக் கைது செய்து கடுமையான நடவடிக்கை எடுக்க வேண்டும் எனவும் அவர் வலியுறுத்தினார்.