கோலாலாம்பூர், அக்டோபர்-25,நாட்டில் இவ்வாண்டின் முதல் 9 மாதங்களில் மட்டும் 54,506 முஸ்லீம் விவாகரத்து வழக்குகள் பதிவாகியுள்ளன.
மாநில அளவில் அதிகபட்சமாகச் சிலாங்கூரில் 10,872 வழக்குகளும், அதைத் தொடர்ந்து ஜோகூர் மற்றும் கெடாவில் அதிக வழக்குகளும் பதிவாகியுள்ளதாக, மலேசிய ஷரியா நீதித் துறை புள்ளிவிவரங்கள் தெரிவிக்கின்றன.
பதிவானவற்றில் இதுவரை 44,000-க்கும் மேற்பட்ட வழக்குகள் முடிவுக்குக் கொண்டுவரப்பட்டுள்ளன.
கணவன்-மனைவிக்கு இடையே பொறுப்புணர்வு குறைபாடு, நிதி நெருக்கடி, தகவல் தொடர்பு சீர்கேடு மற்றும் சமூக ஊடகங்களின் தவறான பயன்பாடு ஆகியவையே விவாகரத்திற்கு முதன்மை காரணங்களாகச் சுட்டிக் காட்டப்படுகின்றன.
குறிப்பாக, திருமணமான முதல் 5 ஆண்டுகள் மிகவும் சவாலானவை என்றும், இந்த இடைப்பட்ட காலத்திலேயே அதிகப்படியான பிரிவுகள் ஏற்படுவதாகவும் நீதிபதிகள் தெரிவிக்கின்றனர்.
நீதிமன்ற விசாரணைகளுக்கு முன்பாக தம்பதியரிடையே சமரச பேச்சுவார்த்தை நடத்த முன்னுரிமை அளிக்கப்படுவதாக ஷரியா நீதித் துறை சுட்டிக்காட்டியுள்ளது.
