AMPFKL11 விருது விழா: சிறந்த திரைப்படமாக ‘Macai’ தேர்வு; ஹிந்த்ரா போஸ் சிறந்த நடிகர் விருதை வென்றார்
கோலாலம்பூர், ஜூன்-21,
கோலாலம்பூர் திரைப்பட விமர்சகர்கள் சங்கத்தின் 11-ஆவது விருது வழங்கும் விழாவில், மலேசிய இந்தியத் திரையுலகைச் சேர்ந்த கலைஞர்கள் முக்கிய விருதுகளை வென்று சாதனை படைத்துள்ளனர்.
உள்ளூர் சினிமா கலைஞர்களின் பங்களிப்பைப் பாராட்டும் நோக்கில் நடைபெற்ற இவ்விருது விழாவில், சிறந்த திரைப்படத்திற்கான உயரிய விருதை ‘Macai’ திரைப்படம் தட்டிச்சென்றது.
சன்-ஜே பெருமாள் மற்றும் சிவானந்தம் பெரியண்ணன் தயாரிப்பில் உருவான இத்திரைப்படம், அதன் தனித்துவமான கதைக்களம் மற்றும் நேர்த்தியான உருவாக்கத்திற்காக நடுவர்கள் மற்றும் ரசிகர்களின் பாராட்டுகளைப் பெற்று, இந்த ஆண்டின் மிகச்சிறந்த மலேசிய இந்தியத் திரைப்படமாக உருவெடுத்துள்ளது.
தொடர்ந்து, ‘Simple Manusan’ திரைப்படத்தில் சிறப்பான நடிப்பை வெளிப்படுத்திய ஹிந்த்ரா போஸ் (Hindra Bose), சிறந்த நடிகருக்கான விருதை வென்றார்.
ஹரன் காவேரி மற்றும் சோபான் இயக்கத்தில் வெளியான இத்திரைப்படம், எளிய மக்களின் எதார்த்தமான வாழ்க்கையைப் பிரதிபலித்ததற்காகப் பாராட்டுகளைப் பெற்றது.
படம் வெளியான போதே ஹிந்த்ராவின் நடிப்பு பெரிதும் பேசப்பட்டது குறிப்பிடத்தக்கது.
இந்த வெற்றிகள் மலேசிய இந்தியத் திரையுலகின் ஆரோக்கியமான பரிணாம வளர்ச்சியை உணர்த்துவதாக திரையுலகினர் கருத்து தெரிவித்துள்ளனர்.
