கோலாலம்பூர், செப்டம்பர் 24 – கிளானா ஜெயா எல்ஆர்டி பாதையில், மஸ்ஜிட் ஜாமெக் நிலையம் அருகே ரயில் ஒன்றின் பிரேக் அமைப்பில் ஏற்பட்ட கோளாறு காரணமாக இன்று காலை ரயில் சேவையில் தாமதம் ஏற்பட்டுள்ளது.
ரேபிட் கேஎல் (Rapid KL) வெளியிட்ட தகவலின்படி, மஸ்ஜிட் ஜாமெக் மற்றும் பசார் செனி நிலையங்களுக்கிடையே அந்த ரயில் இயக்குநரால் நேரடியாகக் கட்டுப்படுத்தப்பட்டு இயக்கப்படுகிறது. இதனால் மற்ற நிலையங்களில் ரயில்களின் இயக்கம் மெதுவாக இருப்பதுடன், நடைப்பாதைகளில் ரயில்கள் வழக்கத்தைவிட அதிக நேரம் நிற்கக்கூடும்.
பயணிகளின் பாதுகாப்பைக் கருத்தில் கொண்டு, பாதிக்கப்பட்ட நிலையங்களில் நிலைய ஊழியர்கள் மற்றும் துணை போலீஸ் அதிகாரிகள் பணியில் ஈடுபடுத்தப்பட்டுள்ளனர். சேவை தொடர்பான அறிவிப்புகள் நிலையங்களிலும் ரயில்களிலும் தொடர்ந்து வழங்கப்படுகின்றன.
