கோலாலாம்பூர், நவம்பர்-28 – விளையாட்டுச் செய்தியாளரும் NPC எனப்படும் தேசிய பத்திரிகை கிளப்பின் துணைத் தலைவருமான ஹரேஷ் டியோல் (Haresh Deol) தாக்கப்பட்ட சம்பவம் தொடர்பில் கைதான சந்தேக நபர், உண்மையில் ஆள் தவறி தாக்கியிருப்பதாக நம்பப்படுகிறது.
கோலாலாம்பூர் போலீஸ் தலைவர் டத்தோ Fadil Marsus அவ்வாறு தெரிவித்துள்ளார்.
அத்தாக்குதல் தனிப்பட்ட காரணங்களால் நடந்ததாக தொடக்கக் கட்ட விசாரணைத் தெரிவிக்கிறது; அதாவது பாதிக்கப்பட்டவர், சந்தேக நபரின் மனைவியை தொந்தரவு செய்தார் என்ற அடிப்படையில் அத்தாக்குதல் நடந்துள்ளது.
ஆனால், சந்தேக நபர் ஆள்மாறி ஹரேஷைத் தாக்கியுள்ளதாக Fadil சொன்னார்.
கைதானவர் 37 வயது வேலையில்லாத ஆடவர் ஆவார்; அவருக்கு பழையக் குற்றப்பதிவுகளும் உள்ளன.
செவ்வாய் முதல் 3 நாட்களுக்குத் தடுத்து வைக்கப்பட்ட அந்நபரின் தடுப்புக் காவல் இன்றோடு முடிவடைகிறது.
இந்நிலையில், அனைத்துத் தரப்பினரின் வாக்குமூலங்களையும் நன்காராய்ந்து, விரிவான விசாரணை அறிக்கையை இறுதிச் செய்வதில் அதிகாரிகள் ஈடுபட்டுள்ளனர்.
அறிக்கை நிறைவடைந்த கையோடு அது மேல் நடவடிக்கைக்காக சட்டத் துறை அலுவலகத்திடம் சமர்ப்பிக்கப்படும் என Fadil சொன்னார்.
தலைநகர் பங்சாரில் செவ்வாய்க் கிழமை காலை மர்ம நபர்களால் ஹரேஷ் தாக்கப்பட்டார்; தாக்கியவர்களில் ஒருவர் அதனைக் கைப்பேசியில் வீடியோவாக பதிவுச் செய்ததும் குறிப்பிடத்தக்கது.
