புத்ராஜெயா, செப்டம்பர்-25,மலேசியா மற்றும் நேப்பாளத்திற்கு இடையிலான தொழிலாளர் தருவிப்பு முறையை மேலும் வலுப்படுத்தவும், தொழிலாளர் சுரண்டலைத் தடுக்கவும் இரு நாடுகளும் இணக்கம் கண்டுள்ளன.
மனிதவள அமைச்சர் டத்தோ ஸ்ரீ ரமணன் ராமகிருஷ்ணன், நேப்பாளத்தின் இளைஞர், தொழிலாளர் மற்றும் வேலைவாய்ப்புத் துறை அமைச்சர் ராம்ஜீ யாதவுடன் (Ramjee Yadav) தொலைப்பேசி வாயிலாக நடத்திய கலந்துரையாடலில் இந்த முடிவு எட்டப்பட்டது.
தொழிலாளர்கள் அதிகப்படியான ஆட்சேர்ப்புக் கட்டணங்களைச் செலுத்துவதைத் தடுக்கவும், இடைத்தரகர்களின் சுரண்டல்களில் இருந்து அவர்களைப் பாதுகாக்கவும் வெளிப்படையான, முறையான வேலைவாய்ப்பு நடைமுறை அவசியம் என்பதை இரு அமைச்சர்களும் வலியுறுத்தினர்.
தொழிலாளர் நிர்வகிப்பானது நாணயத்தன்மை, வெளிப்படைத்தன்மை மற்றும் தொழிலாளர் நலனை அடிப்படையாகக் கொண்டு செயல்பட வேண்டும் என்பதில் மலேசியா உறுதியாக இருப்பதாக ரமணன் தெரிவித்தார்.
இதனிடையே, நேப்பாளத்தில் அண்மையில் ஏற்பட்ட இயற்கைப் பேரிடருக்கு இரங்கல் தெரிவித்த அமைச்சர், அங்கு தொடர்புகொள்ள முடியாமல் உள்ள 55 மலேசியர்களைக் கண்டறிய அனைத்து தூதரக வழிமுறைகளும் முழுவீச்சில் முடுக்கிவிடப்பட்டுள்ளதாகவும் குறிப்பிட்டார்.
