திருச்சி, ஆகஸ்ட்-31,தமிழகத்தின் நாகப்பட்டினம் மாவட்டம் வேளாங்கண்ணி புனித ஆரோக்கிய மாதா பேராலயத்தின் ஆண்டுப் பெருவிழாக் கொடியேற்றத்தின் போது, அலங்கார ஹீலியம் பலூன்கள் வெடித்துச் சிதறியதில் 4 பக்தர்கள் தீக்காயமடைந்தனர்.
இந்தக் கொடியேற்ற விழாவுக்காக வழக்கம் போல் இந்தியாவின் பிற மாநிலங்களிலிருந்தும் பல்வேறு நாடுகளிலிருந்தும் இலட்சக்கணக்கான பக்தர்கள் கூடியுள்ளனர்.
இந்நிலையில்இந்திய நேரப்படி நேற்று மாலை 6.45 மணியளவில் பேராலயப் பேராயர் தலைமையில் கொடியேற்ற நிகழ்வு நடைபெற்றது.
அப்போது வெடிக்கப்பட்ட பட்டாசுகளிலிருந்து வெளிவந்த பொறிகள், கொடிமரத்தின் அருகே பறக்கவிடப்பட்ட ஹீலியம் வாயு பலூன்களின் மீது விழுந்ததில் அவை பலத்த சத்தத்துடன் தீப்பிடித்து வெடித்தன.
இந்த விபத்தில் சென்னை மற்றும் பிற இடங்களைச் சேர்ந்த 4 பக்தர்கள் முகம் மற்றும் உடல்களில் தீக்காயமடைந்தனர்.
அவர்களுக்கு, உடனடியாக முதலுதவி சிகிச்சை அளிக்கப்பட்டு, நாகப்பட்டினம் அரசு மருத்துவக் கல்லூரி மருத்துவமனைக்கு சிகிச்சைக்காக அனுமதிக்கப்பட்டனர்.
சம்பவம் தொடர்பாக போலீஸ் விசாரணை மேற்கொண்டு வரும் நிலையில், செப்டம்பர் 8-ஆம் தேதி வரை நடைபெறவுள்ள 11 நாள் திருவிழா நிகழ்ச்சிகள் திட்டமிட்டபடி தொடருகின்றன.
