கோலாலம்பூர், ஆகஸ்ட்-17-ஹோங் கோங்கில் நடைபெற்ற ஆசிய வலைப்பந்து தகுதிச் சுற்றுப் போட்டியின் போது, மலேசியாவின் தேசிய கீதமான நெகாராகூ (Negaraku) அவமதிக்கப்பட்டதாகக் கூறப்படும் சம்பவம் பொது மக்களிடையே கடும் அதிருப்தியை ஏற்படுத்தியுள்ளது.
ஆகஸ்ட் 15-ஆம் தேதி இலங்கை அணிக்கு எதிரான மூன்றாம் இடத்திற்கான ஆட்டத்திற்கு முன்னதாக, தேசிய வீராங்கனைகள் வரிசையில் நின்றிருந்தபோது இந்தச் சம்பவம் நிகழ்ந்துள்ளது.
நேரலை ஒளிபரப்பின் போது, அடையாளம் தெரியாத நபர் ஒருவர் நெகாராகூவை ஏளனம் செய்யும் வகையில் ஒலி எழுப்பியது தெளிவாகப் பதிவாகியுள்ளது.இந்த ஆட்டத்தில் இலங்கை அணியிடம் 60-க்கு 65 என்ற புள்ளிக் கணக்கில் தோல்வியடைந்த மலேசியா, நான்காவது இடத்தைப் பிடித்தது.
நெகாராகூவைஅவமதித்த நபரின் விவரங்கள் இதுவரை உறுதிச் செய்யப்படாத நிலையில், போட்டி ஏற்பாட்டாளர்கள் தரப்பிலிருந்தும் இதுகுறித்து அதிகாரப்பூர்வ விளக்கம் எதுவும் இதுவரை வெளியிடப்படவில்லை.
