கோலாலம்பூர், நவம்பர்-24 – அரச மலேசியப் போலீஸ் படையும் சாலைப் போக்குவரத்துத் துறையான JPJ-வும், வரும் ஜனவரி 1 முதல் ஒருமுகப்படுத்தப்பட்ட சம்மன் செலுத்தும் முறையை அமுல்படுத்தவிருக்கின்றன.
இதன் மூலம் இதுநாள் வரை வழங்கப்பட்டு வந்த அனைத்து விழாக் கால கட்டணச் சலுகைகள் முடிவுக்கு வருகின்றன.
இப்புதிய முறை “Pay Early, Save More” அதாவது “முன்கூட்டியே செலுத்தினால், அதிகமாக சேமிக்கலாம்” என்ற திட்டத்தில் வழங்கப்படுகிறது.
அவ்வகையில் சம்மன் கிடைத்த 15 நாட்களுக்குள் கட்டினால் 50% தள்ளுபடி கிடைக்கும்.
16 முதல் 30 நாட்களுக்குள் செலுத்தினால் 33% கழிவுக் கிடைக்கும்
அதுவே 31 முதல் 60 நாட்களுக்குள் கட்டினால், முழு அபராதத் தொகையையும் செலுத்த வேண்டும்.
60 நாட்களுக்குப் பிறகு சட்ட நடவடிக்கைப் பாயும் அல்லது வாகனமோட்டிகள் கறுப்புப் பட்டியலிடப்படுவர்.
அமுலாக்க நடவடிக்கைகள் நியாயமாக இருப்பதையும், அதை விட சீராக இருப்பதையும் உறுதிச் செய்வதோடு, பொறுப்பான ஓட்டுநர்களை உருவாக்குவதையும் ஊக்குவிப்பதாக, போக்குவரத்து அமைச்சர் அந்தோணி லோக் கூறினார்.
இப்புதிய முறை அமுலுக்கு வரும் முன், இறுதி சலுகைக் காலமாக டிசம்பர் 31 வரை போலீஸ் அபராதங்களுக்கு 70% வரையும், JPJ அபராதங்களுக்கு 50% வரையும் தள்ளுபடி வழங்கப்படுகிறது.
