ஷா ஆலாம், நவம்பர்-25 – சிலாங்கூர் கிள்ளானில் 1.9 ஏக்கர் நிலத்தை கையகப்படுத்தும் கிள்ளான் மாவட்ட நில அலுவலரின் அறிவிப்பு சட்டப்படி செல்லுபடியாகும் என, ஷா ஆலாம் உயர் நீதிமன்றம் முக்கியத் தீர்ப்பு வழங்கியுள்ளது.
S. சுப்ரமணியம் என்ற நில உரிமையாளர் தொடுத்த வழக்கை தள்ளுபடி செய்து, நீதிபதி அம்முடிவை அறிவித்தார்.
நீண்ட நாட்களாக தள்ளிப்போய் கொண்டிருக்கும் WCE எனப்படும் மேற்குக் கரையோர நெடுஞ்சாலைத் திட்டத்திற்காக இந்த நிலம் தேவைப்படுவதாக மாநில அரசு கூறுகிறது.
இந்நிலையில், கையகப்படுத்தல் அறிவிப்பு சரியாக வழங்கப்படவில்லை என சுப்ரமணியமும் இதர 18 நில உரிமையாளர்களும் வாதிட்டாலும், சட்டப்படி அது கைப்பற்றலை செல்லாததாக்காது என நீதிபதி கூறினார்.
கைப்பற்றப்பட்ட நிலத்திற்காக RM5.4 மில்லியன் இழப்பீடாக வழங்கப்பட்ட நிலையில், நில உரிமையாளர்கள் நியமித்த தனியார் நிறுவனத்தின் மதிப்பீட்டில் அதன் மதிப்பு RM32 மில்லியன் எனக் கூறப்படுகிறது.
தவிர, வெறும் 1.9 ஏக்கர் நிலத்தை மட்டும் எடுத்துக் கொண்டால் மீதமுள்ள 3.1 ஏக்கர் நிலம் வாழ்வதற்கு தகுதியற்றதாகிவிடும் என குடியிருப்பாளர்கள் வலியுறுத்துகின்றனர்.
நிலத்தை நவம்பர் 24-ஆம் தேதிக்குள் காலி செய்ய வேண்டும் என்றும், தவறினால் வீடுகள் உடைக்கப்படுமென்றும் சிலாங்கூர் அரசாங்கம் உத்தரவிட்ட நிலையில், நீதிமன்றத்தின் தீர்ப்பு வெளியாகியுள்ளது.
நில மதிப்பீட்டு விவகாரம் வரும் ஜனவரி 27-ஆம் தேதி விசாரணைக்கு வரும்.
233 கிலோ மீட்டர் நீளமுள்ள இந்த WCE நெடுஞ்சாலை, சிலாங்கூர் பந்திங்-ங்கையும் பேராக் தைப்பிங்-கையும் இணைக்கும் புதிய நெடுஞ்சாலையாக பல்வேறு தாமதங்களுக்கு மத்தியில் பல ஆண்டுகளாக நிர்மாணிக்கப்பட்டு வருவது குறிப்பிடத்தக்கது.
