மடானி மருத்துவத் திட்டத்தில் மோசடி செய்யும் மருத்துவர்கள் மீது நடவடிக்கை தேவை – மலேசிய மருத்துவ சங்கம் கோரிக்கை

கோலாலம்பூர், ஆக 7 – மருத்துவத் திட்டத்தில் மோசடி செய்யும் மருத்துவர்கள் மீது உரிய நடவடிக்கை எடுக்க வேண்டும் என்று மலேசிய மருத்துவ சங்கம் (MMA) கேட்டுக்கொண்டுள்ளது. இது தொடர்பாக சுகாதார அமைச்சர் டத்தோஸ்ரீ டாக்டர் சுல்கிப்ளி அகமட் (Dzulkefly Ahmad ) வெளியிட்டிருக்கும் வருத்தமான வெளிப்பாடுகளை மலேசிய மருத்துவ சங்கம் தீவிரமாக கருதுவதோடு மற்றும் நெறிமுறையற்ற நடைமுறைகளில் ஈடுபட்டதாகக் கண்டறியப்பட்ட மருத்துவர்கள் மீது நடவடிக்கை எடுப்பதை ஆதரிக்கிறது என மலேசிய மருத்துவ சங்கத் தலைவர் டாக்டர் அசிசான் அப்துல் அஸிஸ் ( Azizan Abdul Aziz ) வெளியிட்ட அறிக்கையில் தெரிவித்திருக்கிறார். அதிகரிக்கும் சுகாதாரச் செலவுகளுக்குப் பங்களிக்கும் பெரும்பாலும் இடைத்தரகர்களாகச் செயல்படும் மூன்றாம் தரப்பு நிர்வாகிகளின் பங்கை மதிப்பாய்வு செய்ய வேண்டும் என்றும் அவர் கேட்டுக் கொண்டார். .

மலேசியாவில் உள்ள பெரும்பாலான பொது மருத்துவ பயிற்சியாளர்கள் உயர்தர பராமரிப்பை வழங்குவதற்கும், முதன்மை சுகாதார அமைப்பின் முதுகெலும்பாக இருக்கும் உயர்ந்த நெறிமுறை தரங்களை நிலைநிறுத்துவதற்கும் உறுதி பூண்டுள்ளனர் என்று அவர் கூறினார். இருப்பினும், ஒரு சிலரின் செயல், தங்கள் சமூகங்களுக்கு நேர்மையுடன் சேவை செய்யும் பெரும்பான்மையான அர்ப்பணிப்புள்ள பொது மருத்துவர்களின் நற்பெயருக்குக் களங்கம் ஏற்படுத்தக்கூடாது என்று மலேசிய மருத்துவ சங்கம் உறுதியாக நம்புகிறது என அஸிஸான் கூறினார்.