கின்ஷாஷா , நவ 17 – கொங்கோ ஜனநாயகக் குடியரசில் (DRC) தென் பகுதியிலுள்ள கோபால்ட் ( Kobalt) சுரங்கத்தில் பாலம் இடிந்து விழுந்ததில் குறைந்தது 32 சுரங்கத் தொழிலாளர்கள் மரணம் அடைந்தனர். லுவாலாபா ( Lualaba ) மாநிலத்தில் உள்ள கலண்டோ (Kalando) சுரங்கத்தில் இந்த சம்பவம் நிகழ்ந்ததாக லுவாலாபா உள்துறை அமைச்சர் ராய் கௌம்பா மயோண்டே ( Roy Kaumba Mayonde ) தெரிவித்தார்.
எஞ்சிய தொழிலாளர்களை தேடும் பணி தொடர்ந்து நடைபெற்று வரும் நிலையில் 32 உடல்கள் மீட்கப்பட்டுள்ள.
சுரங்கத் தொழிலாளர்களில் மேலும் சிலர் புதையுண்டிருக்கலாம் என நம்பப்படுவதாக அதிகாரிகள் தெரிவித்தனர். கனமழை மற்றும் நிலச்சரிவு அபாயம் காரணமாக அதிகாரப்பூர்வ தடையை மீறி சுரங்கத் தொழிலாளர்கள் பலர் சுரங்கத்திற்குள் விரைந்ததாக கூறப்பட்டது.
வெள்ளம் சூழ்ந்த பகுதியைக் கடக்க கட்டப்பட்ட தற்காலிக பாலத்தை அவர்கள் தடுமாற்றத்துடன் கடக்கும்போது, கட்டமைப்பு சுமையைத் தாங்க முடியாமல் அப்பாலம் இடிந்து விழுந்தது என Mayonde கூறினார்.
கலண்டோ பகுதியில் இராணுவ வீரர்கள் இருப்பது சுரங்கத் தொழிலாளர்களிடையே அச்சத்தை ஏற்படுத்தியதாக சுரங்க கூட்டுறவுகளை கண்காணிக்கும் அரசு நிறுவனமான SAEMAPE வெளியிட்ட அறிக்கையில் தெரிவிக்கப்பட்டது.
