கோத்தா கினாபாலு, நவம்பர் 30-GRS எனப்படும் சபா மக்கள் கூட்டமைப்பின் தலைவர் டத்தோ ஸ்ரீ ஹஜிஜி நூர், இரண்டாம் தவணையாக அம்மாநிலத்தின் முதல்வராகியுள்ளார்.
தேர்தல் முடிவில் இழுபறி நீடித்ததால், அதிகாலை 3 மணிக்கே பதவியேற்பு நடந்தது.
சபா ஆளுநர் மாளிகையான Istana Seri Kinabalu-வில் ஆளுநர் துன் மூசா அமான் முன்னிலையில் ஹஜிஜி முதல்வராக பதவி உறுதிமொழி எடுத்துக் கொண்டார்.
இத்தேர்தலில் சுலாமான் தொகுதியில் 9,000-க்கும் மேற்பட்ட வாக்கு வித்தியாசத்தில் வெற்றிப் பெற்ற ஹஜிஜி, தொடர்ந்து 9-ஆவது முறையாக அத்தொகுதியைத் தற்காத்துக் கொண்டார்.
மொத்தமுள்ள 73 தொகுதிகளுக்கு பரபரப்புடன் நேற்று நடைபெற்று முடிந்த 17-ஆவது சட்டமன்றத் தேர்தலில், ஆட்சியமைக்கத் தேவையான 37 இடங்களை எந்த கட்சியும் வெல்லவில்லை.
இதனால், பெரும்பாலான கருத்துக் கணிப்புகள் கூறியது போலவே தொங்கு சட்டமன்றம் ஏற்பட்டது.
எனினும் 29 தொகுதிகளில் வெற்றிப் பெற்று தனிப்பெரும் கட்சியாக உருவெடுத்த GRS, அதன் பங்காளிகளி கட்சிகளுடன் இணைந்து புதியக் கூட்டணி அரசை அமைத்துள்ளது.
எந்தெந்தக் கட்சிகள் அரசாங்கத்தில் இடம் பெறும் என்பது இன்னும் அறிவிக்கப்படவில்லை.
இவ்வேளையில், GRS-சுக்கு கடும் போட்டியைக் கொடுத்து WARISAN கட்சி 25 இடங்களில் வெற்றிப் பெற்றுள்ளது; என்றாலும் மீண்டும் முதல்வராகும் டத்தோ ஸ்ரீ ஷாஃபியி அப்டாலின் கனவு நிறைவேறவில்லை.
45 தொகுதிகளில் போட்டியிட்ட தேசிய முன்னணியோ வெறும் எட்டே இடங்களில் வெற்றிப் பெற்றது; 8 தொகுதிகளில் போட்டியிட்ட DAP ஓரிடம் கூட வெல்ல முடியாமல் மொத்தமாக துடைத்தெடுக்கப்பட்டது.
அதே சமயம், பெரிக்காத்தான் நேஷனல் சார்பில் போட்டியிட்ட PAS கட்சி, காராம்பூனாய் தொகுதியில் வெற்றிப் பெற்று சபா மண்ணில் தனது முதல் சட்டமன்றத் தொகுதியைக் கைப்பற்றி வரலாறு படைத்துள்ளது.
