கோலாலம்பூர், அக் 20-எல்லை தாண்டிய புகைமூட்டத்தை ஏற்படுத்தும் காட்டுத்தீயைக் கட்டுப்படுத்த இந்தோனேசியாவுக்கு உதவுவதில் மலேசியா தொடர்ந்து உறுதியுடன் இருக்கிறது. துணைப் பிரதமர் Datuk Seri Ahmad Zahid Hamidi அவ்வாறு தெரிவித்திருக்கிறார்.
இந்தோனேசியா மேற்கொண்டு வரும் ஒட்டுமொத்த தீயணைப்பு நடவடிக்கைகளுடன் ஒப்பிடுகையில், மலேசியா வழங்கும் வளங்களும் பணியாளர்களும் குறைவாக இருந்தாலும், அண்டை நாட்டுக்கு ஆதரவளிக்கும் இந்த முயற்சி தொடரும். உதவி சிறிய அளவில் இருந்தாலும், அது முக்கியமான ஆதரவாக அமையும். ஒரு Bombardier விமானம், மூன்று ஹெலிகாப்டர்கள் மற்றும் 50 பணியாளர்களை அனுப்ப மலேசியா தயாராக இருப்பதாக அவர் கூறினார்.
இதனிடையே, நாட்டில் நிலவும் புகைமூட்டச் சூழல் மற்றும் தொடர்ந்து ஏற்படும் தீ விபத்துகளுக்கு மத்தியில், வடகிழக்குப் பருவமழையை எதிர்கொள்ளவும் சாத்தியமான வெள்ளப் பாதிப்புகளைக் கையாளவும் அரசாங்கம் தயாராக இருப்பதாக Zahid தெரிவித்தார்.
தயார்நிலை நடவடிக்கைகளில் அரசுத் துறைகள் மற்றும் நிறுவனங்களுடன் அரசு சாரா அமைப்புகளும் இணைந்து செயல்படுகின்றன. குறிப்பாக, வெள்ள அபாயம் உள்ள பகுதிகளில் வசிப்பவர்களை முன்கூட்டியே பாதுகாப்பான இடங்களுக்கு வெளியேற்றுவதற்கு உதவும் முன்னெச்சரிக்கை ஏற்பாடுகளுக்கு முக்கியத்துவம் அளிக்கப்படுவதாக துணைப்பிரதமர் குறிப்பிட்டார்.
