ஷா அலாம் , நவ 14- அண்மையில் கிள்ளான் புக்கிட் திங்கியில் உள்ள ஒரு பெட்ரோல் நிலையத்தில் வேலையில்லாத நபர் ஒருவர் துப்பாக்கியால் சுட்டுக் கொல்லப்பட்ட சம்பவம் தொடர்பில் சந்தேகப் பேர்வழிகளான மூன்று ஆடவர்களை சிலாங்கூர் போலீசார் கைது செய்தனர்.
19 முதல் 35 வயதுக்குட்பட்ட அனைத்து சந்தேக நபர்களும் கிள்ளான் சுற்று வட்டார பகுதியில் கைது செய்யப்பட்டதாக சிலாங்கூர் போலீஸ் தலைவர் டத்தோ ஷாசெலி கஹார் ( Shazeli Kahar ) தெரிவித்தார். விசாரணைக்கு உதவுவதற்காக போலீசார் இதுவரை மூவரை கைது செய்துள்ளனர்.
அவர்களின் தடுப்புக் காவல் திங்கட்கிழமை முடிவடையும். விசாரணை தொடர்ந்து நடைபெற்று வருவதால் இது குறித்து மேல் விவரங்கள் எதனையும் தெரிவிக்க முடியாது என Shazeli கூறினார்.
சமூக வலைத்தலங்களில் வைரலான அந்த துப்பாக்கச் சூடு சம்பவத்திற்கு குண்டர் கும்பலுடன் தொடர்பு இருப்பதாக கூறப்படுவது குறித்து வினவப்பட்டபோது பல்வேறு அம்சங்களை போலீஸ் விசாரணை உள்ளடக்கியிருப்பதாகவும் அவற்றில் குண்டர் கும்பலும் ஒன்றாகும் என Shazeli மறுமொழி கூறினார்.
மரணம் அடைந்தவரின் பின்னணி உட்பட பல்வேறு கோணங்களில் விசாரணை நடைபெற்று வருவதாக அவர் தெரிவித்தார்.
கடந்த அக்டோபர் மாதம் 7ஆம் தேதி புக்கிட் திங்கியிலுள்ள பெட்ரோல் நிலையத்தில் துப்பாக்கிச் சூட்டின்போது மரணம் அடைந்த நபர் உள்நாட்டைச் சேர்ந்தவர் என இதற்கு முன் உறுதிப்படுத்தப்பட்டது.
