கோம்பாக், செப்டம்பர்-26 – நாடு முழுவதும் 469 இடங்களில் ஒரே நேரத்தில் நடைபெற்ற ‘மலேசியத் தூய்மை தினம் 2026’ திட்டத்தின் கீழ், சுமார் 200,000 மக்களைப் பங்கேற்கச் செய்ய இலக்கு நிர்ணயிக்கப்பட்டுள்ளது.
வீடமைப்பு மற்றும் ஊராட்சித் துறை அமைச்சான KPKT ஏற்பாட்டில் இன்று இத்திட்டத்தின் தேசிய அளவிலான தொடக்க விழா, சிலாங்கூர், தாமான் ஸ்ரீ கோம்பாக் பொதுச் சந்தையில் நடைப்பெற்றது.
அமைச்சர் ஙா கோர் மிங் இந்நிகழ்வை அதிகாரப்பூர்வமாகத் தொடக்கி வைத்தார்.
தூய்மையைப் பேணுதல், மறுசுழற்சியை ஊக்குவித்தல் மற்றும் பொறுப்பான கழிவு மேலாண்மையை மக்களின் அன்றாட வாழ்க்கை முறையாக மாற்றுவதே இந்த மாபெரும் இயக்கத்தின் முதன்மை நோக்கமாகும்.
இதன் ஒரு பகுதியாக, நாடு முழுவதும் பத்தாயிரத்துக்கும் மேற்பட்ட பள்ளிகளைச் சேர்ந்த மாணவர்களும் இத்தூய்மைப் பணியில் தீவிரமாக இணைக்கப்பட்டுள்ளனர்.
200,000 மக்களின் ஒருங்கிணைந்த பங்கேற்பு மற்றும் ஒரே நாளில் 28 ஆயிரம் கிலோ கிராம் மறுசுழற்சிப் பொருட்களைச் சேகரிப்பதன் வாயிலாக, இரண்டு புதிய மலேசியச் சாதனைகளைப் படைக்கவும் திட்டமிடப்பட்டுள்ளது.
சுற்றுச்சூழலைத் தூய்மையாகப் பராமரிப்பது அரசாங்கத்தின் பணி மட்டுமல்ல; அது ஒவ்வொரு குடிமகனின் கூட்டுப் பொறுப்பு என்பதையும் அமைச்சர் ஙா கோர் மிங் தமதுரையில் வலியுறுத்தினார்.
