காஜாங், ஆகஸ்ட்-29 – மலேசியத் தொழில்நுட்ப பல்கலைக்கழகத்தின் PALAPES கேடட் பயிற்சி வீரரான Syamsul Haris Shamsudin-னின் தாயார், தனது மகனுக்கு மரண விசாரணைக் கோருகிறார்.
சபாவில் முதலாம் படிவ மாணவி சாரா கைரினா மகாதீரின் மரணத்தைப் போன்றே, தனது மகனின் மரணத்தைச் சுற்றியும் ஏராளமான முரண்பாடுகள் இருக்கின்றன; எனவே உண்மையைக் கண்டறிய மரண விசாரணைக்கு தேசிய சட்டத் துறைத் தலைவர் உத்தரவிட வேண்டும் என, Ummu Haiman Bee Daulatgun வலியுறுத்தினார்.
சாரா கைரினா விஷயத்தில் சடலம் தோண்டியெடுக்கப்பட்டு இரண்டாவது சவப்பரிசோதனை செய்யப்பட்டதை, குடும்ப வழக்கறிஞர் டத்தோ நரன் சிங் அரா சிங் சுட்டிக் காட்டினார்.
ஆகஸ்ட் 19-க்கு முன்பு குடும்பத்தினர் சட்டத் துறை அலுவலகத்தில் முறையான கோரிக்கையைச் சமர்ப்பித்ததாகவும், ஆனால் இன்னும் பதில் கிடைக்கவில்லை என்றும் அவர் கூறினார்.
இறந்துபோன Syamsul-லுக்கு வலிப்பு ஏற்பட்டதாகவும் ஒரு பக்கமும், அவர் சண்டையில் ஈடுபட்டதாக
மற்றொரு பக்கமும் கூறப்படுகிறது; இந்நிலையில், உண்மையைத் தீர்மானிக்க விசாரணை நடத்தப்பட்டே ஆக வேண்டுமென்றார் அவர்.
முன்னதாக, Syamsul-லின் உடலைத் தோண்டி எடுப்பதைக் காண்பதற்காக அவர்கள் கல்லறை வந்திருந்தனர்.
சாரா கைரினாவின் வழக்கைப் போலவே, இந்த மரண விசாரணை வெளிப்படைத்தன்மை மற்றும் நீதியை உறுதிப்படுத்த உதவும் என நம்புவதாக நரன் கூறினார்.
“அனைவருக்கும் நீதி மற்றும் சம உரிமைகள் தேவை,” என்றார் அவர்.
