கோலாலம்பூர், நவம்பர்-26 – பிரபல விளையாட்டுச் செய்தியாளரான Haresh Deol மீது நடத்தப்பட்டுள்ள தாக்குதல் குறித்து உடனடி விசாரணை நடத்துமாறு, தொடர்புத் துறை அமைச்சர் டத்தோ ஃபாஹ்மி ஃபாட்சில் வலியுறுத்தியுள்ளார்.
ஊடகவியலாளர்களின் பாதுகாப்பு குறிப்பாக செய்தி சேகரிக்கும் பணியின் போது அவர்களின் பாதுகாப்புடன் சமரசம் செய்துகொள்ள முடியாது என்றார் அவர்.
ஊடகவியலாளர்கள் எந்தவோர் அச்சுறுத்தல் அல்லது இடையூறு இன்றி தங்களின் பணியைச் செய்வது உறுதிச் செய்யப்பட வேண்டுமென ஃபாஹ்மி சொன்னார்.
இவ்வேளையில், Haresh Deol-லைத் தாக்கியதாக நம்பப்படும் 3 மர்ம நபர்களை போலீஸ் தேடி வருகிறது.
அவர்கள் இன்னும் அடையாளம் காணப்படவில்லை; என்றாலும் தேடுதல் வேட்டை தீவிரப்படுத்தப்பட்டிருப்பதாக, பிரிக்ஃபீல்ட்ஸ் போலீஸ் கூறியது.
அத்தாக்குதலிலிருந்து தப்பிக்கும் முயற்சியில் கீழே விழுந்ததில் Haresh Deol முகம், கை மற்றும் உடம்பில் காயடைந்ததுள்ளார்.
ஒரு பேரங்காடியின் கார் நிறுத்துமிடம் அருகே Jalan Maarof சாலையிலிருந்து Jalan Telawi நோக்கி நடந்துசெல்லும் போது அவர் தாக்கப்பட்டார்.
இதையடுத்து, TwentyTwo13 இணையச் செய்தி ஊடகத்தின் இணை நிறுவனரும், NPC எனப்படும் தேசிய பத்திரிகை கிளப்பின் துணைத் தலைவருமான Haresh நேற்று மாலை 4 மணியளலில் போலீஸில் புகார் செய்தார்.
Haresh 25 ஆண்டுகளாக அரசு நிர்வாகம் மற்றும் பொறுப்புக்கூறல் குறித்த செய்திகளை வெளியிட்டு வருகிறார்.
இவரின் அண்மையக் கைவண்ணங்களில், மலேசிய விளையாட்டு, குறிப்பாக நிர்வாக பிரச்னைகள் மற்றும் தேசியக் கால்பந்து அணியின் ‘கலப்பு மரபின’ ஆட்டக்காரர்களை உட்படுத்திய ஆவண மோசடி குறித்த புலனாய்வு செய்திகளும் அடங்கும்.
அவரது ஊடகப் பணிக்கும் தாக்குதலுக்கும் இடையே எந்த தொடர்பும் இதுவரை உறுதிச் செய்யப்படவில்லை என்றாலும், நடந்த சம்பவம் ஊடகச் சமூகத்தினர் மத்தியில் கவலையை ஏற்படுத்தியுள்ளது.
இத்தாக்குதலை ஒரு துணிச்சலான மிரட்டல் நடவடிக்கை என ஊடக அமைப்புகள் கண்டித்துள்ளன.
