கிள்ளான், நவம்பர் 30-கிள்ளான், தாமான் மெஸ்ரா இண்டாவில் நேற்றிரவு நடந்த துப்பாக்கிச் சூட்டில் ஓர் இந்திய ஆடவர் சுட்டுக் கொல்லப்பட்டார்.
இரவு 9 மணியளவில் அச்சம்பவம் நிகழ்ந்ததாக நம்பப்படுகிறது.
முன்னதாக வீட்டொன்றின் முன்புறம் 4 சக்கர வாகனத்தினுள் அவ்வாடவர் சரிந்து விழுந்து பேச்சு மூச்சின்றி கிடந்த 2 வீடியோக்கள் வைரலாகின.
பல முறை துப்பாக்கிச் வேட்டு சத்தம் கேட்டதாக சம்பவத்தை நேரில் பார்த்தவர்கள் கூறினர். எனினும் அது இன்னும் உறுதிப்படுத்தப்படவில்லை.
நள்ளிரவு வரைக்குமான தகவலின்படி, தடயவியல் அதிகாரிகளும், K9 மோப்ப நாய்கள் படையும் சம்பவ இடத்தில் சோதனை நடத்தி வந்தனர்.
இந்நிலையில் இறந்தவரின் தாயார் என நம்பப்படும் மாது இரவு 11.15 மணி வாக்கில், மேலும் சிலருடன் சம்பவ இடம் வந்தபோது பரபரப்பு ஏற்பட்டது.
இறந்தவரின் உடலைப் பார்க்க வேண்டுமென அவர் கேட்டபோது, பணியிலிருந்த போலீஸ்காரர்கள் அவரைத் தடுத்தனர்.
அவரோ “அது என் மகன், என் மகன்!” என கதறினார்; அவரை போலீஸாரும் அங்கிருந்த பொது மக்களும் அமைதிப்படுத்தினர்.
அச்சம்பவம் குறித்த முழு விவரங்கள் போலீஸ் தரப்பிலிருந்து இன்று காலை வெளியாகுமென எதிர்பார்க்கப்படுகிறது.
