கூச்சிங், நவம்பர் 30-டிக் டோக் வழியாக வந்த பகுதி நேர வேலை வாய்ப்பு போலியென தெரியாமல் RM527,000-க்கும் மேல் இழந்துள்ளார் சரவாக், கூச்சிங்கைச் சேர்ந்த 71 வயது மூதாட்டி ஒருவர்.
“TK Shop” என்ற தளத்தின் மூலம் எளிய பணிகளைச் செய்தால் அதிக கமிஷன் கிடைக்கும் என அவருக்கு வாக்குறுதி அளிக்கப்பட்டது.
அதனை சரியாக ஆராயாத அம்மூதாட்டி, 23 தடவையாக 16 வங்கி கணக்குகளுக்கு மொத்தமாக RM527,130 பணத்தை மாற்றியுள்ளார்.
ஆனால் சொன்னபடி கமிஷன் கிடைக்காத பிறகே, தான் ஏமாற்றப்பட்டதை உணர்ந்து அவர் போலீஸில் புகார் செய்தார்.
இந்நிலையில், இதுபோன்ற 49 மோசடி சம்பவங்கள் இவ்வாண்டு கூச்சிங்கில் பதிவாகியுள்ளதாக மாவட்ட போலீஸ் கூறியது.
அவற்றின் மொத்த இழப்பு RM2.26 மில்லியனாகும்.
எனவே, இலாபகரமான வருமானம் கிடைக்கும் என்ற ஆசை வார்த்தைகளோடு வரும் பகுதிநேர வேலை வாய்ப்புகள் குறித்து பொது மக்கள் எப்போதும் எச்சரிக்கையாக இருக்க வேண்டும்; சலுகைகள் சந்தேகத்திற்குரியதாக இருந்தால் உடனடியாக அதிகாரிகளிடம் சரிபார்க்கவும் அறிவுறுத்தப்படுவதாக போலீஸ் கூறிற்று.
