கோத்தா கினாபாலு, நவம்பர் 30-ஓரிடம் கூட வெல்லாமல் சபா சட்டமன்றத் தேர்தலில் DAP கண்ட படுதோல்விக்கு முழுப் பொறுப்பேற்றுக் கொள்வதாக, அக்கட்சியின் பொதுச் செயலாளர் அந்தோணி லோக் தெரிவித்துள்ளார்.
“மாநில மக்களின் முடிவை முழு மனதுடன் மதிக்கிறோம்” என்றார் அவர்.
கடந்த முறை 6 இடங்களில் வெற்றிப் பெற்ற DAP, இம்முறை லிக்காஸ், லூயாங், தஞ்சோங் ஆரு, கபாயான் உள்ளிட்ட 8 தொகுதிகளில் போட்டியிட்டது.
ஆனால் அத்தனை இடங்களிலும் அது தோல்வியுற்றது; பெரும்பாலான இடங்களை முன்னாள் முதல்வர் டத்தோ ஸ்ரீ ஷாஃபியி அப்டால் தலைமையிலான WARISAN கட்சியிடம் அது இழந்தது.
தேர்தல் தோல்விலியிருந்து கற்றுக்கொண்ட பாடங்களை கட்சியின் தலைமை கவனத்தில் கொள்ளும்; அடுத்தடுத்தத் தேர்தல்களில் மீண்டும் ஆதரவைப் பெற அதன் பலவீனங்களை DAP ஆய்வு செய்யும் என, போக்குவரத்து அமைச்சருமான அந்தோணி லோக் கூறினார்.
2004-ஆம் ஆண்டுக்குப் பிறகு முதன் முறையாக சபா சட்டமன்றத்தில் ஓரிடம் கூட இல்லாமல் போனாலும், DAP-க்கு இன்னும் அம்மாநிலத்தில் 2 எம்.பி.க்கள் உள்ளனர் -அவர்கள் தங்கள் முயற்சிகளை முடுக்கிவிடுவார்கள் என்று அவர் கூறினார்.
தோல்வி கண்ட DAP வேட்பாளர்களில், மத்திய துணையமைச்சரும் சபா DAP துணைத் தலைவருமான டத்தோ Chan Foong Hin முக்கியமானவர் ஆவார்.
நகர்ப்புற சீன வாக்காளர்களின் மனநிலையில் ஏற்பட்ட மாற்றம், DAP சட்டமன்ற உறுப்பினர்கள் உள்ளூர் மக்கள் பிரச்னைகளிலிருந்து விலகி இருந்தது, வாக்காளர்கள் சபாவின் சுயாட்சி மற்றும் உரிமைகளுக்குக் குரல் கொடுக்க WARISAN போன்ற சபாவை மையமாகக் கொண்ட கட்சிகள் பக்கம் சாய்ந்தது ஆகியவை, DAP-யின் இந்த படுதோல்விக்கான காரணங்கள் என ஆய்வாளர்கள் தெரிவிக்கின்றனர்.
