கோலாலம்பூர், ஆகஸ்ட்-19-மானிய விலையிலான சமையல் எண்ணெயை பாட்டில்களில் மாற்றி அடைத்து, பூஜைக்கான எண்ணெயாக அதிக விலைக்கு விற்று வந்த கும்பலை உள்நாட்டு வாணிப மற்றும் வாழ்க்கைச் செலவின அமைச்சான KPDN முறியடித்துள்ளது.
கோலாலம்பூர் செந்தூல் மற்றும் சௌகிட் பகுதிகளில் நடத்தப்பட்ட சோதனைகளில், சுமார் 165,000 ரிங்கிட் மதிப்புடைய 9 டன் சமையல் எண்ணெய் பறிமுதல் செய்யப்பட்டது.
இரு மாத உளவுத் தகவல்களின் அடிப்படையில் இந்த அதிரடி நடவடிக்கை மேற்கொள்ளப்பட்டதாக கோலாலம்பூர் KPDN துணை இயக்குநர் Mohd Shahran Mohd Arshad தெரிவித்தார்.
ஒரு கிலோ மானிய எண்ணெய் பாக்கெட்டுகளை 2 ரிங்கிட் 45 சென்னுக்கு வாங்கிய அக்கும்பல், அதை பாட்டில்களில் அடைத்து கிள்ளான் பள்ளத்தாக்கு சில்லறை விற்பனையாளர்களுக்கு 7 ரிங்கிட் 50 சென்னுக்கு விற்று வந்துள்ளது.
ஒரே வளாகத்தில் மட்டும் நாள்தோறும் சுமார் ஒரு டன் மானிய எண்ணெய் இவ்வாறு மறுசுழற்சி முறையில் பாட்டில்களில் அடைக்கப்பட்டுள்ளது.
இந்நிலையில், அரசாங்கத்தின் மானியப் பொருட்கள் தவறாகப் பயன்படுத்தப்படுவதைத் தடுக்க, Ops Tiris 4.0 சோதனை நடவடிக்கைகள் தொடர்ந்து தீவிரப்படுத்தப்படும் என்று அமைச்சு எச்சரித்துள்ளது.
