புத்ராஜெயா, செப்டம்பர்-2-புத்ராஜெயா தேசிய தின அணிவகுப்பு கொண்டாட்டத்தின் போது, பொது மக்களுக்கு இடையூறு விளைவிக்கும் வகையில் நடந்துகொண்ட சம்பவம் தொடர்பில் போலீஸ் தீவிர விசாரணை நடத்தி வருகிறது.
ஆகஸ்ட் 31-ஆம் தேதி காலை 5 மணியளவில் சதுக்கத்தின் நுழைவாயில் திறக்க காத்திருந்த பொது மக்கள் மத்தியில், ஆரஞ்சு நிற சட்டை அணிந்த நபர் ஒருவர் தள்ளுமுள்ளுவை ஏற்படுத்தியுள்ளார்.
அத்துடன், தடுப்புச் சுவர்களைத் தாண்டிச் செல்லுமாறு அவர் மக்களைத் தூண்டியதோடு, அங்கிருந்த போலீஸ் அதிகாரியிடம் தகாத முறையில் சத்தமிட்ட வீடியோக்கள் சமூக வலைத் தளங்களில் வைரலாக பரவியுள்ளன.
இது தொடர்பாக ஆகஸ்ட் 31 மற்றும் செப்டம்பர் 1 ஆகிய தேதிகளில் மொத்தம் 4 போலீஸ் புர்கள் பெறப்பட்டதாக, புத்ராஜெயா மாவட்டப் போலீஸ் தலைவர் ACP Aidi Sham தெரிவித்தார்.
பொது அமைதிக்கு ஊறு விளைவித்தல், தொடர்பு மற்றும் பல்லூடகச் சட்டம் மற்றும் சிறு சிறு குற்றங்களுக்கான சட்டத்தின் கீழ் வழக்குப் பதிவுச் செய்யப்பட்டுள்ளது.
சம்பந்தப்பட்ட நபரை புத்ராஜெயா போலீஸ் தலைமையகத்திற்கு வந்து வாக்குமூலம் அளிக்குமாறும் அறிவுறுத்தப்பட்டுள்ளது.
அதே சமயம், பொது மக்களும் தகவல்கள் ஏதும் வைத்திருப்பின் விசாரணைக்கு உதவுமாறு கேட்டுக் கொள்ளப்படுகிறார்கள்.
