போர்ட் கிள்ளான், அக்டோபர்-6 – போர்ட் கிள்ளான் ஸ்ரீ சுப்பிரமணியர் ஆலயத்திற்கு நில அலுவலகம் நோட்டீஸ் அனுப்பியுள்ள விவகாரத்தில், பக்தர்கள் தேவையின்றி அச்சமடைய வேண்டாம் என செந்தோசா சட்டமன்ற உறுப்பினர் Dr குணராஜ் ஜோர்ஜ் கேட்டுக் கொண்டுள்ளார்.
அரசு நில ஆக்கிரமிப்பு தொடர்பில் கிள்ளான் மாவட்ட நில அலுவலகம் வழங்கிய அந்த நோட்டீஸ் குறித்து ஆலய நிர்வாகத்துடன் பேச்சுவார்த்தை நடத்திய பின் அவர் அறிக்கை வெளியிட்டுள்ளார்.
நோர்த்போர்ட் மற்றும் வெஸ்ட்போர்ட்ஸை இணைக்கும் ‘கிழக்குக் கரை இரயில் இணைப்பு’ (ECRL) திட்டத்துடன் தொடர்புடைய விவகாரம் இது என்றும், ஆலயத்தின் மூலஸ்தானமோ அல்லது முக்கியக் கட்டட அமைப்புகளோ இதனால் பாதிக்கப்படவோ அல்லது இடிக்கப்படவோ மாட்டாது என்று அவர் உறுதிப்படுத்தினார்.
தவிர, இரயில் பாதைக்கான தூண்கள் அமைப்பது தொடர்பான தொழில்நுட்ப வரைபடங்கள் இன்னும் இறுதிச் செய்யப்படவில்லை; போக்குவரத்து அமைச்சு மற்றும் இரயில்வே அதிகாரிகளுடன் பேச்சுவார்த்தை நடந்து வருவதாகவும் அவர் சொன்னார்.
இந்நிலையில், இது தொடர்பாக மாவட்ட அதிகாரியை நேரில் சந்திக்கவுள்ளதாகவும், வளர்ச்சிப் பணிகள் அவசியமாக இருந்தாலும் வழிபாட்டுத் தலங்களின் பாதுகாப்பு உறுதிச் செய்யப்பட வேண்டும் என்றும் குணராஜ் வலியுறுத்தினார்.
