கோத்தா பாரு, அக்டோபர் 7 – கோத்தா பாரு, காடோக் (Kadok), கம்போங் பாடாங் லெபாய் (Kampung Padang Lepai) பகுதியில் 44 வயது செவிலியர் ஒருவர் தனது கணவரால் ஆறு முறை கத்தியால் குத்தப்பட்டு படுகாயம் அடைந்துள்ளார்.
நேற்று முன்தினம் இரவு 8.30 மணியளவில் நடந்த இந்தச் சம்பவத்தில், அந்தப் பெண்ணின் உடல் மற்றும் கழுத்தில் காயங்கள் ஏற்பட்டன. அவர் தற்போது மருத்துவமனையில் சிகிச்சை பெற்று வருகிறார்.
சம்பவத்திற்குப் பிறகு, 47 வயதான அவரது கணவர் காவல்துறையிடம் சரணடைந்ததால் கைது செய்யப்பட்டார். இந்தச் சம்பவத்துக்கான காரணம் இன்னும் தெரியாத நிலையில், விசாரணைக்காக அவர் ஏழு நாட்கள் தடுப்புக் காவலில் வைக்கப்பட்டுள்ளார்.
கோத்தா பாரு மாவட்ட காவல்துறைத் தலைவர் அசிஸ்டன் கமிஷனர் முகமட் அஸ்மிர் டாமிரி (Mohd Azmir Damiri) கூறுகையில், இந்த வழக்கு குற்றவியல் சட்டத்தின் கீழ் விசாரிக்கப்பட்டு வருகிறது. அதே நேரத்தில் சந்தேகநபரிடமிருந்து ஒரு கத்தியும் பறிமுதல் செய்யப்பட்டுள்ளது.
