காட்மண்டு, ஆகஸ்ட்-31,நேப்பாளத்தின் நுவாகோட் மாவட்டத்தில், பள்ளி முதல்வர் ஒருவரின் விரைவான நடவடிக்கையால் 1,643 மாணவர்கள் கொடூர வெள்ளப்பெருக்கிலிருந்து அதிர்ஷ்டவசமாக உயிர் தப்பினர்.
திரிபுவன் திரிசூலி இடைநிலைப் பள்ளியின் முதல்வர் ராஜேந்திர தாவாடிக்கு காலை 9.20 மணியளவில் வெள்ளப்பெருக்கு குறித்து அவசர தொலைபேசி அழைப்பு வந்துள்ளது.
உடனடியாகச் செயல்பட்ட அவர், பள்ளி மணியை அடித்து அனைத்து மாணவர்களையும் பாதுகாப்பான உயரமான பகுதிக்கு விரைவாக வெளியேற்றினார்.
மாணவர்கள் அனைவரும் வெளியேறிய சில நிமிடங்களில், சேறும் சகதியுமாக வந்த வெள்ள நீர் 3 மாடி பள்ளி கட்டிடத்தை முற்றிலுமாக அழித்துச் சென்றது.ஆனால், 1,643 மாணவர்களும் பாதுகாப்பாக உயிர் தப்பினர்.
அதே சமயம், மீண்டும் ஆபத்தான பகுதிக்குச் சென்ற இரண்டு பள்ளி ஊழியர்கள் பரிதாபமாக உயிரிழந்தனர்.
நேப்பாள-திபெத் எல்லைக்கு அருகே ஏற்பட்ட பனிப்பாறை மற்றும் பாறைச் சரிவு காரணமாகவே இந்தத் திடீர் வெள்ளப்பெருக்கு ஏற்பட்டு பெரும் உயிரிழப்பையும் சேதங்களையும் ஏற்படுத்தியுள்ளது.
