சீ போட்டிக்குத் தயாராகி வரும் தேசிய கபடி அணிக்கு நிதிச் சிக்கல்; பொது மக்களின் உதவியை நாடும் மலேசிய கபடி சங்கம்

கோலாலம்பூர், நவம்பர்-27,

தாய்லாந்தில் நடைபெறும் சீ விளையாட்டுப் போட்டியில் முதன் முறையாக கபடியும் சேர்த்துக் கொள்ளப்பட்டிருப்பது அனைவரும் அறிந்ததே.

இந்நிலையில், இந்த அரிய வாய்ப்பை சரியாகப் பயன்படுத்தி கொள்ளும் நோக்கில் மலேசியக் கபடிக் குழு தீவிர பயிற்சிகளில் ஈடுபட்டு வருகிறது.

பல்வேறு சவால்களுக்கு மத்தியில் சுமார் 1 மில்லியன் செலவில் அப்பயிற்சிகள் மேற்கொள்ளப்பட்டு வருவதாக, மலேசியக் கபடி சங்கத்தின் பொதுச் செயலாளர் அருள்பிரகாஷ் பாலகிருஷ்ணன் கூறினார்.

எப்படியோ சமாளித்து 9 மாத பயிற்சிகளை கடந்துவிட்ட நிலையில், போட்டி நெருங்கும் இந்த சமயத்தில் நிதி சிக்கல் ஏற்பட்டுள்ளதாக அருள் சொன்னார்.

எதிர்பார்த்த நிதி ஆதரவும் வந்துசேரவில்லை; எனவே வேறு வழியின்றி பொது மக்களின் உதவியை சங்கம் நாடியுள்ளதாக அவர் குறிப்பிட்டார்.

நன்கொடை கொடுக்க விரும்பும் நல்லுள்ளங்கள் திரையில் காணும்/ கீழ்காணும் வங்கி கணக்கு எண்களில் அவ்வாறு செய்யலாம்.

தேசிய கபடி அணியின் சீ போட்டி கனவு நிறைவேற பொது மக்களின் வற்றாத ஆதரவு முக்கியம் என்றார் அவர்.

33-ஆவது சீ விளையாட்டுப் போட்டி வரும் டிசம்பர் 9-ஆம் தேதி தாய்லாந்தில் அதிகாரப்பூர்வமாக தொடங்குகின்றது.