தங்காக், ஜூன்-23-ஜோகூர் மாநிலத் தேர்தல் களம் சூடுபிடித்துள்ள நிலையில், பக்காத்தான் ஹராப்பான் கூட்டணி அனைத்து 56 தொகுதிகளுக்கான முழு வேட்பாளர் பட்டியலை அதிகாரப்பூர்வமாக வெளியிட்டுள்ளது.
தங்காக், புக்கிட் கம்பீர் திடலில் நடைபெற்ற பிரம்மாண்ட கூட்டத்தில், கூட்டணியின் தலைவர் டத்தோ ஸ்ரீ அன்வார் இப்ராஹிம் இந்த வேட்பாளர் பட்டியலை அறிமுகப்படுத்தினார்.
_’முன்னோக்கிச் செல்லும் ஜோகூர்_’ என்ற சுலோகத்துடன் ஜோகூர் ஆட்சியை மீண்டும் கைப்பற்றும் நோக்கில், அனுபவம் வாய்ந்த தலைவர்கள் மற்றும் இளம் தொழில்முறை வல்லுநர்கள் உள்ளடக்கிய கலவையாக இந்த அணி உருவாக்கப்பட்டுள்ளது.
அவர்களில் முன்னாள் அமைச்சர் Dr மஸ்லி மாலிக் (Maszlee Malik) முக்கியமானவராவார்.
அதோடு, இம்முறை கூட்டணியில் அனைத்து சமூகப் பிரதிநிதித்துவத்திற்கும் முக்கியத்துவம் அளிக்கப்பட்டுள்ளது.
அந்த வகையில், 4 இந்திய வேட்பாளர்களும் இம்முறை களமிறங்குகின்றனர்.
புக்கிட் கெப்போங்கில் (Bukit Kepong) மணி, லாயாங்-லாயாங்கில் (Layang-Layang) குணா பாலகிருஷ்ணன், பாலோ (Paloh) சட்டமன்றத்தில் Dr ரூபன் ஆறுமுகம், மற்றும் ஸ்கூடாய் தொகுதியில் கார்த்தியாயினி ஜெயபாலன் ஆகியோரே அந்நால்வராவர்.
வேட்பாளர்கள் அறிவிக்கப்பட்ட போதிலும், பக்காத்தான் மந்திரி பெசார் வேட்பாளராக யாரும் பெயர் குறிப்பிடப்படவில்லை.
வரும் சனிக்கிழமை, ஜூன் 27 -ஆம் தேதி வேட்புமனுத் தாக்கலும், ஜூலை 11-ஆம் தேதி வாக்குப்பதிவும் நடைபெறவுள்ள நிலையில், ஜோகூர் தேர்தல் களம் களைக்கட்டத் தொடங்கியுள்ளது.
