ஜோகூர், அக்டோபர் 5 – ஜோகூர் (Johor) யோங் பெங் (Yong Peng) பள்ளியில் 16 வயது மாணவி உயிரிழந்த சம்பவத்தைத் தொடர்ந்து, அந்தப் பள்ளியின் பாதுகாப்பு ஏற்பாடுகள் குறித்து கல்வி அமைச்சு விரிவான ஆய்வு நடத்தி வருகிறது.
பள்ளிக்கு பாதுகாப்பு வழங்கும் நிறுவனத்தின் பணிகள் முறையாக மேற்கொள்ளப்பட்டனவா என்பதை அமைச்சு ஆய்வு செய்கிறது. குறிப்பாக, பாதுகாப்புப் பணியாளர்களின் ரோந்து பதிவுகள் மற்றும் சம்பவம் நடந்த நாளில் அவர்கள் மேற்கொண்ட பணிகள் குறித்து விசாரிக்கப்படுகிறது.
ஒப்பந்த விதிகளை பாதுகாப்பு நிறுவனம் மீறியது கண்டறியப்பட்டால், எச்சரிக்கை, அபராதம் அல்லது ஒப்பந்தத்தை நிறுத்துதல் போன்ற நடவடிக்கைகள் எடுக்கப்படலாமென கல்வி அமைச்சர் ஃபத்லினா சிடேக் (Fadhlina Sidek) தெரிவித்தார்.
மேலும், பள்ளியின் நுழைவு மற்றும் வெளியேறும் கட்டுப்பாடு, ரோந்து பணிகள், சிசிடிவி வசதி மற்றும் பாதுகாப்பு நடைமுறைகள் ஆகியவையும் மறுஆய்வு செய்யப்படுகின்றன.
இதற்கிடையில், மாணவி மரணம் தொடர்பான காவல்துறை விசாரணை தனியாக தொடர்ந்து நடைபெறுகிறது. சம்பவம் தொடர்பாக மூன்று 16 வயது மாணவர்கள் கைது செய்யப்பட்டுள்ளனர்.
