கோலாலம்பூர், அக்டோபர் 26 – மலேசியாவில் காற்றின் திசை மாறியதைத் தொடர்ந்து, சரவாக் மாநிலத்தைத் தவிர மற்ற பகுதிகளில் புகைமூட்டம் படிப்படியாகக் குறைந்து வருகிறது.
மலேசிய வானிலை ஆய்வுத் துறையின் (MetMalaysia) தலைமை இயக்குநர் டாக்டர் முகமட் ஹிஷாம் முகமட் அனிப் (Dr Mohd Hisham Mohd Anip) கூறுகையில், நாளை தொடங்கும் வடகிழக்குப் பருவமழையால், அண்டை நாடுகளிலிருந்து புகைமூட்டம் மலேசியாவுக்குள் பரவுவது குறையும் என்றார்.
இந்த வாரம் நாட்டின் பெரும்பாலான பகுதிகளில் ஈரப்பதமான வானிலை நிலவும் என்றும், கிழக்குக் கடற்கரை மாநிலங்களில் அதிகாலை மழையும், மற்ற பகுதிகளில் பிற்பகல் மற்றும் இரவு நேரங்களில் கனமழையுடன் இடியுடன் கூடிய மழையும் பெய்யக்கூடும் என்றும் அவர் தெரிவித்தார்.
2026 மற்றும் 2027ஆம் ஆண்டுக்கான வடகிழக்குப் பருவமழை அக்டோபர் 27ஆம் தேதி தொடங்கி, 2027 மார்ச் மாதம் வரை நீடிக்கும் என எதிர்பார்க்கப்படுகிறது. நவம்பர் முதல் ஜனவரி வரை மூன்று முதல் ஐந்து முறை தொடர் கனமழை பெய்யக்கூடும் என்பதால், தாழ்வான பகுதிகளிலும் ஆற்றங்கரைகளிலும் வெள்ளப்பெருக்கு ஏற்படும் அபாயம் உள்ளதாகவும் எச்சரிக்கப்பட்டுள்ளது.
இன்று காலை 7 மணி நிலவரப்படி, சரவாக் மாநிலம் செரியான் (Serian) பகுதியில் காற்று மாசுக் குறியீடு (IPU) 155 ஆகப் பதிவாகி, ஆரோக்கியமற்ற நிலையில் இருந்தது. அதேவேளை, நாட்டின் பெரும்பாலான பகுதிகளில் காற்றின் தரம் மிதமான அல்லது நல்ல நிலையில் பதிவானது.
