மெக்கா, நவம்பர் 17- சவூதி அரேபியாவில் மெக்கா நகரிலிருந்து
உம்ரா புனித யாத்ரீகர்களை ஏற்றிச் சென்ற பேருந்து, மெடினா திரும்பும் வழியில் டீசல் டாங்கி லாரியுடன் மோதியதில், குறைந்தது 42 இந்தியப் பிரஜைகள் கொல்லப்பட்டனர்.
மோதியக் கையோடு பேருந்து வெடித்து தீப்பற்றியது; இதனால் அப்போது தூங்கிக் கொண்டிருந்த பயணிகளால் உயிர் தப்ப முடியாமல் போயிற்று.
பேருந்திலிருந்த பயணிகளில் பெரும்பாலோர் தெலங்கானா மாநிலத்தின் ஹைதராபாத்தைச் சேர்ந்தவர்கள் ஆவர்.
அவர்களில் 20 பெண்களும் 11 குழந்தைகளும் அடங்குவர்.
பேருந்து முற்றாகக் கருகியதால் சடலங்களை அடையாளம் காண்பது பெரும் சிரமமாக இருப்பதாக அதிகாரிகள் கூறினர்.
மெக்காவில் உம்ரா சடங்குகளை முடித்து விட்டு திரும்பும் போது ஏற்பட்ட அவ்விபத்தில், ஒரேயொருவர் உயிர் தப்பி மருத்துவமனையில் அனுமதிக்கப்பட்டதாக உறுதிப்படுத்தப்படாத தகவல்கள் கூறுகின்றன.
இந்நிலையில், ரியாத்தில் உள்ள இந்திய தூதரகம் வாயிலாக தெலங்கானா அரசாங்கம் அடுத்தக் கட்ட நடவடிக்கையில் இறங்கியுள்ளது.
