டாக்கா, நவ 24 – மாணவர் தலைமையிலான கிளர்ச்சியை எதிர்த்து நடத்தப்பட்ட கடுமையான அடக்குமுறை தொடர்பாக தூக்கு தண்டனை விதிக்கப்பட்ட முன்னாள் பிரதமரான பதவி நீக்கம் செய்யப்பட்ட ஷேக் ஹசினாவை இந்தியாவிலிருந்து வெளியேற்றும்படி வங்காளதேச அரசாங்கம் கோரிக்கை விடுத்துள்ளது.
78 வயதான ஹசினா , கடந்த ஆண்டு ஆகஸ்டு மாதம் தனது சர்வாதிகார ஆட்சி அகற்றப்பட்டதிலிருந்து இந்தியாவில் தலைமறைவாக இருந்து வருகிறார்.
ஷேய்க் ஹசினாவை நாடு கடத்தக் கோரி வெள்ளிக்கிழமை இந்தியாவுக்கு கடிதம் அனுப்பினோம் என வங்கதேசத்தின் இடைக்கால நிர்வாகத்தில் வெளியுறவுத் துறையை வைத்திருக்கும் தௌஹிட் ஹோசைய்ன் ( Touhid Hossain ) தெரிவித்தார். கடிதத்தின் உள்ளடக்கங்களை அவர் விரிவாகக் கூறவில்லை.
ஹசீனா தப்பி ஓடியதிலிருந்து மூன்றாவது அதிகாரப்பூர்வ நாடுகடத்தல் கோரிக்கை இதுவாகும் என வங்காளதேச பத்திரிகையொன்று தெரிவித்தது.
மனுக்குலத்திற்கு எதிரான குற்றங்களுக்காக ஹசீனாவை குற்றவாளி எனக் கண்டறிந்து அவருக்கு மரண தண்டனை விதித்த நீதிமன்றத் தீர்ப்பைத் தொடர்ந்து, அவர் திரும்புவதற்கு வசதியாக இருதரப்பு உடன்பாட்டின் கீழ் டெல்லிக்கு கட்டாயப் பொறுப்பு உள்ளது என்று டாக்காவில் வெளியுறவு அமைச்சு தெரிவித்துள்ளது.
