அலோர் ஸ்டார், நவம்பர் 2 – இணையவழி மோசடி நடவடிக்கைகளில் ஈடுபட்ட 130 மலேசியர்கள் பாகிஸ்தானில் கைது செய்யப்பட்டதைத் தொடர்ந்து, அடுத்தகட்ட நடவடிக்கைகள் குறித்து மலேசியாவும் பாகிஸ்தானும் ஆலோசித்து வருகின்றன.
இதனை உள்துறை அமைச்சர் டத்தோஸ்ரீ சைஃபுதீன் நசுத்தியோன் இஸ்மாயில் (Saifuddin Nasution Ismail) தெரிவித்தார்.
பாகிஸ்தான் உள்துறை அமைச்சரிடமிருந்து சுமார் இரண்டு வாரங்களுக்கு முன்பு இந்தக் கைது நடவடிக்கை குறித்து தகவல் கிடைத்ததாகவும், இதனைத் தொடர்ந்து புக்கிட் அமான் வர்த்தகக் குற்றப் புலனாய்வுத் துறையும் பாகிஸ்தான் அதிகாரிகளும் இணைந்து அடுத்தகட்ட நடவடிக்கைகள் குறித்து பேச்சுவார்த்தை நடத்தி வருவதாகவும் அவர் கூறினார்.
இதற்கிடையில், கெடா மாநிலம் கூலிம் உயர் தொழில்நுட்பப் பூங்காவில் (KHTP) நடத்தப்பட்ட நடவடிக்கையில் 33 பாகிஸ்தானியர்கள் மற்றும் சில இந்தியர்கள் கைது செய்யப்பட்டதாகவும் அவர் குறிப்பிட்டார். கைது செய்யப்பட்ட 33 பாகிஸ்தானியர்களும் பின்னர் நீதிமன்றத்தில் குற்றஞ்சாட்டப்பட்டுள்ளனர்.
இவ்விவகாரம் தொடர்பான விசாரணை தொடர்ந்து நடைபெற்று வருவதாகவும், அடுத்தகட்ட நடவடிக்கைகளைத் தீர்மானிப்பதற்கான அறிக்கையை எதிர்பார்த்திருப்பதாகவும் அவர் தெரிவித்தார்.
இதற்கிடையில், மலேசிய எல்லைப் பாதுகாப்பு மற்றும் பாதுகாப்பு முகமையின் (AKPS) தலைமை இயக்குநர் டத்தோஸ்ரீ முகமட் ஷுஹைலி முகமட் ஜைனுக்குப் (Mohd Shuhaily Mohd Zain) பதிலாக புதியவர் நியமிப்பது குறித்து இதுவரை எந்த ஆலோசனையும் நடத்தப்படவில்லை என்றும் அமைச்சர் தெரிவித்தார். விசாரணை அல்லது குற்றச்சாட்டுகளை எதிர்கொள்ளும் அரசு ஊழியர்கள் தொடர்பான நடவடிக்கைகள் நடைமுறையிலுள்ள அரசுப் பணிமுறை விதிகளின்படி கையாளப்படும் என்றும் அவர் கூறினார்.
