ஜோகூர் பாரு, நவ 13-ஜோகூர், லார்கின் சென்ட்ரல் பேருந்து முனையத்தில் பேருந்து ஓட்டுநர் ஒருவரைத் தாக்கி, மிரட்டல் விடுத்ததாக நம்பப்படும் மூன்று நபர்களைக் காவல்துறையினர் தீவிரமாகத் தேடி வருகின்றனர். அச்சம்பவம் மீதான காணொளி இணையத்தில் பரவலாகப் பகிரப்பட்டு வருகிறது.
41 வயதுடைய பாதிக்கப்பட்ட ஓட்டுநர் நேற்று பிற்பகல் 1.46 மணியளவில் அளித்த புகாரின் அடிப்படையில் காவல்துறை விசாரணையைத் தொடங்கியதாக ஜோகூர் பாரு தென் மாவட்டக் காவல் துறைத் தலைவர், உதவி ஆணையர் Azrul Hisham Mohd Shaffei தெரிவித்தார். பேருந்து முனையத்தில் மூன்று நபர்கள் தம்மைத் தாக்கி மிரட்டியதாக அந்த ஓட்டுநர் புகாரில் குறிப்பிட்டுள்ளார்.
அச்சம்பவத்திற்கான காரணம் இதுவரை கண்டறியப்படவில்லை. அதில் தொடர்புடையதாகச் சந்தேகிக்கப்படும் மூவரையும் அடையாளம் கண்டு தேடும் பணிகள் முடுக்கி விடப்பட்டுள்ளன. வேண்டுமென்றே காயம் ஏற்படுத்திய குற்றத்திற்காக குற்றவியல் சட்டத்தின் பிரிவு 323-ன் கீழும், குற்றவியல் மிரட்டல் விடுத்ததற்காகப் பிரிவு 506-ன் கீழும் விசாரணை மேற்கொள்ளப்பட்டு வருகிறது.
அச்சம்பவம் குறித்து ஏதேனும் தகவல் தெரிந்த பொதுமக்கள், ஜோகூர் பாரு தென் மாவட்டக் காவல் தலைமையகத்தின் 07-2182323 என்ற அவசர அழைப்பு எண்ணில் தொடர்பு கொள்ளுமாறு Azrul கேட்டுக் கொண்டார்.
