அதிகரிக்கும் போலி திருமண அழைப்பிதழ் லிங்க்குகள்; WhatsAppஐ கைப்பற்றிய ஸ்காமர்கள்

கோலாலம்பூர், நவம்பர் 25 – திருமண அழைப்பிதழ் என பாசாங்கு செய்து அனுப்பப்படும், போலி ‘link’-குகளை வைத்து, மக்களின் புலன கணக்குகளைத் திருடி, அவர்களின் நண்பர்கள் மற்றும் குடும்பத்தினரிடம் பணம் கேட்டு ஏமாற்றும் புதிய மோசடி நாட்டில் அதிகரித்து வருகிறது.

இந்நிலையில் ஓய்வு பெற்ற போலீஸ் ஒருவரிடமிருந்து கிடைக்கப்பெற்ற அந்த link-கை கிளிக் செய்ததும், தனது WhatsApp கணக்கு உடனே முடக்கப்பட்டதென்று Strata Owners நிறுவனத்தின் இயக்குனர் சோங் (Chong) தெரிவித்தார்.

மேலும் புலனம் வாயிலாக தன்னை யாரேனும் தொடர்புக்கொள்ள முயற்சித்தால், அவை நேரடியாக ஸ்காமர்களிடம் சென்றுவிடுவதால் தன்னால் பேச இயலவில்லை என்றும் அவர் குறிப்பிட்டார்.

இந்த வாய்ப்பை பயன்படுத்தி, ஸ்காமர்கள் Chong-இன் பெயரில் அவரைச் சார்ந்தவர்களிடம் பணம் கேட்டு செய்தி அனுப்பியதைத் தொடர்ந்து அவரது நண்பர் ஒருவர் கொடுக்கப்பட்ட வங்கி கணக்கிற்கு சுமார் 3,000 ரிங்கிட்டை அனுப்பி உள்ளார்.

இந்நிலையில் பொதுமக்கள் எச்சரிக்கையாக இருக்க வேண்டுமென்றும், அறிமுகமானவர்களிடமிருந்து வந்தாலும் சந்தேகமான லிங்குகளைக் கிளிக் செய்யக்கூடாதென்றும் வலியுறுத்தப்பட்டது.