இசையமைப்பாளர் அனிருத் ரவிச்சந்தரும், சன் குழுமத் தலைவர் கலாநிதி மாறனின் மகள் காவ்யா மாறனும் நேற்று நவம்பர் 11ஆம் தேதி கிரீஸ் நாட்டில் திருமணம் செய்துகொண்டனர்.
நெருங்கிய உறவினர்கள் மற்றும் நண்பர்கள் முன்னிலையில் நடைபெற்ற திருமணத்தில், திரையுலக மற்றும் அரசியல் பிரபலங்கள் கலந்துகொண்டனர். திருமணப் புகைப்படங்களை அனிருத் தனது சமூக வலைத்தளப் பக்கத்தில் பகிர்ந்து, தனது வாழ்க்கையின் புதிய அத்தியாயத்தை ரசிகர்களுக்கு அறிவித்தார்.
விழாவில் நடிகர் ரஜினிகாந்த், அவரது மனைவி லதா, மகள் ஐஸ்வர்யா, மு.க. ஸ்டாலின், உதயநிதி ஸ்டாலின், தயாநிதி மாறன் உள்ளிட்டோர் கலந்துகொண்டனர். மணமக்களுடன் ரஜினிகாந்தும் ஸ்டாலினும் எடுத்துக்கொண்ட புகைப்படங்கள் ரசிகர்களின் கவனத்தை ஈர்த்துள்ளன.
திருமணக் கொண்டாட்டத்தின் முக்கியக் கவன ஈர்ப்பாக அமைந்தது ரஜினிகாந்தின் நடனம். அனிருத் இசையில், ‘வேட்டையன்’ திரைப்படத்தில் இடம்பெற்ற ‘மனசிலாயோ’ பாடலுக்கு ரஜினி உற்சாகமாக நடனமாடினார்.
அவரது நடனத்தைப் பார்த்த மணமக்கள் அனிருத்தும் காவ்யாவும் கைதட்டி உற்சாகப்படுத்தினர். குடும்பத்தினருடன் ரஜினி மகிழ்ச்சியாக நடனமாடிய அந்தக் காணொளி தற்போது இணையத்தில் வைரலாகி வருகிறது.
திருமணத்தில் அனிருத் வெளிர் நிறக் குர்தா, வேஷ்டி மற்றும் வேலைப்பாடுகள் கொண்ட மேலங்கியை அணிந்திருந்தார். காவ்யா இளஞ்சிவப்பு நிற லெஹங்கா மற்றும் நகைகளுடன் மணப்பெண்ணாகத் தோன்றினார்.
திருமணப் புகைப்படங்களுடன், “My once in a lifetime, for a lifetime” என்ற காதல் வரிகளையும், திருமணத் தேதியான ‘11.11’ என்பதையும் அனிருத் பதிவிட்டிருந்தார்.
கிரீஸில் நடைபெற்ற திருமணத்தைத் தொடர்ந்து, நவம்பர் 21ஆம் தேதி சென்னையில் இவர்களது திருமண வரவேற்பு நடைபெறவுள்ளது. இதற்காக காவ்யாவின் பெற்றோர் கலாநிதி மாறனும் காவேரி மாறனும் தெலங்கானா முதலமைச்சர் ரேவந்த் ரெட்டியை நேரில் சந்தித்து அழைப்பு விடுத்துள்ளனர்.
