பெட்டாலிங் ஜெயா, ஏப்ரல்-16-ஒரு நாடகப் போட்டியில் இடம்பெற்ற ‘அநாகரீகமான’ காட்சி பொது மக்களிடையே பெரும் கண்டனத்தைப் பெற்றதைத் தொடர்ந்து, மலாயா பல்கலைக்கழகமான UM பகிரங்க மன்னிப்புக் கேட்டுள்ளது.
சமூக வலைத்தளங்களில் பரவிய அந்த வீடியோவில், ஒரு ஜோடி படுக்கையில் மிகவும் நெருக்கத்தில் இருப்பது போன்ற காட்சி இடம்பெற்றிருந்தது.
இது பல்கலைக்கழகத்தின் நற்பெயருக்கும், கலாச்சார பண்புகளுக்கும் முரணானது என இணையவாசிகள் விமர்சித்தனர்.
இதுகுறித்து விளக்கம் அளித்த UM நிர்வாகம், “முன்கூட்டியே சரிபார்க்கப்பட்ட அசல் காட்சியமைப்பில் இந்த குறிப்பிட்ட காட்சி இடம்பெறவில்லை” என தெளிவுப்படுத்தியது.
எனவே விதிமுறைகளை மீறியதற்காக அந்த நாடகக் குழு போட்டியிலிருந்து உடனடியாக தகுதி நீக்கம் செய்யப்பட்டுள்ளது.
இனிவரும் காலங்களில் இதுபோன்ற சம்பவங்கள் நிகழாதிருக்க, மாணவர் கலை நிகழ்ச்சிகளைக் கண்காணிக்கும் நடைமுறைகள் தீவிரப்படுத்தப்படும் என்றும் UM உறுதியளித்துள்ளது.
