“நீங்க ஷாப்பிங் பண்ணுங்க, நாங்க தூக்குறோம்”; டெல்லி நிறுவனத்தின் புதிய சேவைக்கு இணையத்தில் குவியும் ஆதரவும் எதிர்ப்பும்

புது டெல்லி, மே-27,

இந்தியத் தலைநகர் புது ​டெல்லியில் உள்ள பரபரப்பான சந்தைப் பகுதிகளில் ஷாப்பிங் செய்பவர்களின் சுமையைக் குறைக்க, CarryMen என்ற புதிய நிறுவனமொன்று தொடங்கப்பட்டுள்ளது.

​”நீங்கள் ஷாப்பிங் செய்யுங்கள், நாங்கள் சுமக்கிறோம்” என்ற வித்தியாசமான சுலோகத்துடன் செயல்படும் இந்த நிறுவனம், ஒரு மணி நேரத்திற்கு வெறும் 149 ரூபாய் அதாவது 6 ரிங்கிட் 15 சென் கட்டணத்தில் ஷாப்பிங் உதவியாளர்களை வழங்குகிறது.

இந்த உதவியாளர்கள் வாடிக்கையாளர்களுடன் கடை வீதிகளுக்கு வந்து அவர்களின் கனமான பைகளைச் சுமப்பதுடன், வாகன நிறுத்துமிடம் அல்லது பேருந்து- இரயில் நிலையம் வரை கொண்டு வந்து சேர்க்கின்றனர்.

அதோடு, உங்களுக்காக உணவக வரிசைகளில் நின்று உணவுகளை வாங்கித் தரும் சேவையையும் செய்கிறார்கள்.

​கூடுதல் கட்டணமாக குடைகள், கைப்பேசி சார்ஜர்கள் மற்றும் கைக்குழந்தைகளுக்கான prams போன்ற வசதிகளும் வழங்கப்படுகின்றன.

​இந்த புதுமையான சிந்தனை தற்போது இணையத்தில் பெரும் விவாதத்தை ஏற்படுத்தியுள்ளது.

“இனி கணவன்மார்களுக்கும், பிள்ளைகளுக்கும் ஷாப்பிங்கில் இருந்து விடுதலை” என பலர் நகைச்சுவையாகக் கூறினாலும், ஊழியர்களுக்கான ஊதியம் மற்றும் தொழிலாளர் உரிமை குறித்த சில விமர்சனங்களும் எழுந்துள்ளன…