கோலாலம்பூர், ஆகஸ்ட்-19-நாடாளுமன்ற மேலவை உறுப்பினர்களுக்கான (செனட்டர்) தகுதி வயதை 30-லிருந்து 25-ஆகக் குறைப்பதற்கான பரிந்துரை அமைச்சரவையின் கவனத்திற்குக் கொண்டு செல்லப்படும் என, இளைஞர் மற்றும் விளையாட்டுத்துறை அமைச்சர் Dr முஹமட் தௌஃபிக் ஜொஹாரி தெரிவித்துள்ளார்.
நாடாளுமன்றத்தில் இளைஞர்களின் பிரதிநிதித்துவத்தை அதிகரிக்கும் நோக்கில் இந்தப் பரிந்துரை முன்வைக்கப்பட்டுள்ளது.
செராஸில் நடைபெற்ற தேசிய இளைஞர் ஆலோசனைக் கூட்டத்தில் கொண்டுவரப்பட்ட முக்கிய முன்மொழிவுகளில் இதுவும் ஒன்றாகும் என்றார் அவர்.
இதனுடன், நாடாளுமன்ற உறுப்பினர்களின் பணிக்கால வரம்பை முறைப்படுத்துவது மற்றும் புதுப்பிக்கத்தக்க எரிசக்தித் துறையில் இளைஞர்களின் பங்களிப்பை அதிகரிப்பது ஆகிய அம்சங்களும் அதில் ஆலோசிக்கப்பட்டன.
சம்பந்தப்பட்ட துறைகளின் கருத்துகள் பெறப்பட்டுவிட்டதாகவும், அடுத்த அமைச்சரவைக் கூட்டத்தில் இதுகுறித்த குறிப்பு அறிக்கை சமர்ப்பிக்கப்படும் என்றும் அமைச்சர் தெரிவித்தார்.
நாட்டின் எதிர்காலத்தை வழிநடத்தும் திறன்மிக்க இளம் தலைவர்களை உருவாக்குவதில் அமைச்சு தீவிர கவனம் செலுத்தி வருவதாகவும் அவர் குறிப்பிட்டார்.
