திருச்சூர், செப்டம்பர்-6,கேரளா, திருச்சூர் அருகே நிறுத்தி வைக்கப்பட்டிருந்த லாரி மீது கார் மோதிய கோர விபத்தில், தமிழகத்தைச் சேர்ந்த 8 பொறியியல் மாணவர்கள் பரிதாபமாக உயிரிழந்தனர்.
திருச்சூர் மாவட்டம் கைப்பமங்கலம் தேசிய நெடுஞ்சாலையில், நேற்றிரவு இந்த விபத்து நிகழ்ந்தது.
திண்டுக்கல் தனியார் கல்லூரியில் பயிலும் மாணவர்கள் 8 பேர், காரில் குருவாயூரிலிருந்து கொடுங்கல்லூர் நோக்கிச் சென்று கொண்டிருந்தனர்.
அப்போது, சாலை விரிவாக்கப் பணி நடைபெற்று வந்த பகுதியில் சட்டவிரோதமாக நிறுத்தி வைக்கப்பட்டிருந்த லாரியின் பின்புறத்தில் கார் பலமாக மோதியது.
இதில் காரில் பயணித்த 8 பேரில் 7 பேர் சம்பவ இடத்திலேயே பலியானார்கள்.
தகவலறிந்து வந்த தீயணைப்பு மற்றும் மீட்புப் படையினர், நசுங்கிய காரை வெட்டி எடுத்து உடல்களைக் கைப்பற்றினர்.
படுகாயங்களுடன் மருத்துவமனைக்குக் கொண்டுச் செல்லப்பட்ட எட்டாவது மாணவரும் பின்னர் சிகிச்சைப் பலனின்றி உயிரிழந்தார்.
தலைமறைவாக உள்ள லாரி ஓட்டுநர் மீது போலீஸார் வழக்குப் பதிவுச் செய்து தீவிர விசாரணை மேற்கொண்டு வருகின்றனர்.
இவ்வேளையில், விபத்தில் உயிரிழக்கும் முன், நண்பர்கள் 8 பேரும் மகிழ்ச்சியாகக் காருக்குள் எடுத்துக் கொண்ட வீடியோ தற்போது வைரலாகி, பார்ப்போரை கலங்க வைக்கிறது.
