
பாச்சோக், நவ.18-தாய்லாந்திலிருந்து கொண்டு வரப்பட்டதாகச் சந்தேகிக்கப்படும் பல்வேறு முத்திரைகளைக் கொண்ட 469 கிலோகிராம் உறைந்த sosejகள் மற்றும் உணவுப் பொருட்கள் கிளந்தானில் கைப்பற்றப்பட்டுள்ளன. பொது நடவடிக்கைப் படை (PGA) Tawang, Kampung Wakaf Aik பகுதியில் நடத்திய சோதனையின்போது அவற்றைப் பறிமுதல் செய்தது.
‘Op Salju Mega’ நடவடிக்கையின் கீழ், Bachok மாவட்ட சுகாதார அலுவலக அதிகாரிகளுடன் இணைந்து PGA நேற்று அச்சோதனையை மேற்கொண்டது. கடையொன்றின் முன்பகுதியில் 25 வயதுடைய உரிமையாளரைச் சந்தித்த அதிகாரிகள், அருகிலிருந்த குளிரூட்டப்பட்ட கொள்கலனைச் சோதனையிட்டபோது, தாய்லாந்து மொழியில் லேபிள்கள் ஒட்டப்பட்ட பல்வேறு உறைந்த உணவுப் பொட்டலங்களைக் கண்டுபிடித்தனர்.
கைப்பற்றப்பட்ட உணவுப் பொருட்களில் 1985ஆம் ஆண்டின் உணவு விதிமுறைகளின் கீழ் கட்டாயமாக இடம்பெற வேண்டிய விவரக் குறிப்புகள் இல்லை. அதனைத் தொடர்ந்து, சம்பந்தப்பட்ட உரிமையாளருக்கு Bachok மாவட்ட சுகாதார அலுவலகம் குற்ற அறிக்கை வழங்கியதுடன், அனைத்து உறைந்த உணவுப் பொருட்களையும் பறிமுதல் செய்ததாக பொது நடவடிக்கை படையின் தென்கிழக்கு பிரிகேட் தளபதி Datuk Ahmad Radzi Hussain தெரிவித்தார்.
விசாரணையில், அந்த உரிமையாளர் சுமார் எட்டு ஆண்டுகளாக உறைந்த உணவுப் பொருட்கள் விற்பனைத் தொழிலில் ஈடுபட்டு வருவதும், தாய்லாந்திலிருந்து கொண்டு வரப்பட்டதாகக் கருதப்படும் பொருட்களை Kota Bharuவில் வணிகம் செய்யும் பெண் ஒருவரிடமிருந்து வாங்கியதும் தெரியவந்தது. வாடிக்கையாளர்களின் தேவைக்கேற்ப வாரத்திற்கு மூன்று முறை, ஒவ்வொரு முறையும் 200 முதல் 300 பொட்டலங்கள் வரை வாங்கி வந்ததாகவும் அந்நபர் தெரிவித்தார்.
அவர் Bachok மாவட்ட சுகாதார அலுவலகத்திடம் ஒப்படைக்கப்பட்டுள்ளார். பறிமுதல் செய்யப்பட்ட பொருட்களும் அங்கு சேர்க்கப்பட்டுள்ளன. அதோடு விசாரணையும் மேற்கொள்ளப்பட்டு வருகிறது.



